بەهۆی بۆردومانەكانی دەوڵەتی توركەوە ڕۆژ بە ڕۆژ ژینگە و سروشتی ناوچە سنوورییە شاخاوییەكانی هەرێمی كوردستان بەرەو لەناوچوون دەچێت، وتەبێژی دەستەی ژینگەی هەرێمیش داوای ڕاگرتنی پەلاماردانەکان دەکات و دەڵێت: ژینگە قوربانیی سەرەكیی بۆردومانەكانە و هەڕەشەی جدیی لەناوچوونی لەسەرە.
دەوڵەتی تورک، لە ڕێگەی فڕۆکە جەنگییەکان و تۆپخانەکانییەوە بەردەوامە لە بۆردومانکردن و تۆپبارانکردنی گوند و ناوچەکانی سنووری باشووری کوردستان، تائێستا جگە لە شەهید و بریندارکردنی سەدان هاوڵاتی باشوری کوردستان، هەزاران دۆنم دارستان و پوش و پاوانیش سوتاون و بۆردومانەکان بوونەتە هەڕەشەی بەردەوام لەسەر ژینگەی ناوچەکە.
لەو بارەیەوە هەندرێن شێخ ڕاغب، وتەبێژی دەستەی ژینگە لە هەرێمی كوردستان، بە ڕۆژنیوزی ڕاگەیاند، ژینگە قوربانی بەردەوامی بۆردومانی ناوچە سنووریەكانە و سامانێكی گەورەی نیشتیمانیە كە دەبێتە قوربانی بەردەوامی جەنگەكان، وتیشی: ڕاپۆرت و تێبینی بەردەواممان نوسیوە بۆ لایەنی پەیوەندیدار و مەترسی جددی خۆمان لەبارەی تێكچوون و لەناوچوونی ژینگەی سروشتی ناوچە سنوورییەكان دەربڕیووە.
بەوتەی وتەبێژی دەستەی ژینگە جەنگ و بۆردومانەكان لەسەر حیسابی ژینگە و سروشتە و ئەوان نیگەرانن لەو دۆخەی بەسەر ژینگەی سروشتی كوردستاندا دێت، وەك ئەو دەشڵێت: ژینگە سوودمەندی بواری ئاشتیە و هەركاتێك شەڕو جەنگ كۆتایی بێت ژینگە سوودی پێدەگات، هەربۆیە ئەوان داویان كردووە شەڕ بوەستێت و چیتر ژینگە نەبێتە قوربانیی.
لەبارەی ئاماری لەناوچوونی دارودرەختی سروشتی لەناوچە سروشتیەكان، وتەبێژی دەستەی ژینگە دەڵێت: بەهۆی دۆخی كۆرۆنا و دۆخی تایبەتی ناوچە سنوورییەكان نەیانتوانیوە ئەمساڵ ئامارێكی ورد كۆبكەنەوە، ئەوەشیخستەڕوو کە سەرقاڵن سەرجەم داتاكان كۆبكەنەوە و ڕایبگەیەنن، ڕەخنەش لەستانداردی ڕێژەی سەوزایی دەگرێت و پێیوایە ڕێژەی سەوزایی لەهەرێمی كوردستان لەئاستی ستانداردی جیهانی نیە و ئۆتۆمبێل و بڕینەوەی دارودرەخت لە پال بۆردومانەکاندا پاڵەپەستۆی زیاتریان خستووەتە سەر ژینگەی هەرێمی كوردستان.
ک.س
