چوؤرشەممە, 5 فبر 2020 – 07:37 ڕۆژنیوز – هەولێر
بە پێی ئامارێك كە دەست ڕۆژنیوز كەوتووە، لە ئێستادا لە هەرێمی كوردستان زیاتر لە ٢٠٠ پاڵاوگەی نایاسایی نەوت بوونیان هەیە کە زۆرترینیان لە سنوری پارێزگای هەولێر و سلێمانیدان.
دەستەی پاراستن و چاکكردنی ژینگەش دووپاتیدەکاتەوە، ئەو پاڵاوگە نایاساییانە كاریگەرییەكی خراپییان لەسەر پیسبوونی ژینگە هەیە.
فازڵ عەباس، هاوڵاتیەكی شاری هەولێرەو لەبارەی دۆخی ژینگەی شارەکەیەوە دەڵێت، هەبوونی ئەو پاڵاوگە نایاساییانە، لەلایەن بەرپرسانی حزب و حکومەتەوە سەرپەرشتی دەکرێن، هەر ئەوەش هۆکارە بۆ مانەوەیان لە هەلومەرجێکی ناشەفاف و بێ چاودێری حکومەتدا کار بکەن.
لای خۆیەوە هەندرێن شێخ راغیب، وتەبێژی دەستەی پاراستن و چاككردنی ژینگەی حكومەتی هەرێمی كوردستان بە ڕۆژنیوزی ڕاگەیاند، “هەرێمی كوردستان لەبەردەم مەترسییەكی گەورەی ژینگەیدایە و هەمیشە ئێمە وەك دەستە ئەو مەترسیەمان ڕاگەیاندووە كە پێویستە ڕێگا لە بەردەم زۆربوونی مەترسییەكانی پیسبوونی ژینگە بگیرێت”.
جەختی لەوەشکردەوە، بەهۆی زۆری ئۆتۆمبێل و كارگە و پاڵاوگە نایاساییەكانەوە، دۆخی ژینگەی هەولێرو هەرێمی كوردستان لە بەردەم مەترسیەكی گەورەی ژینگەدایە.
لە بەرامبەردا دکتۆر سامی ئەحمەد، پسپۆڕی نەخۆشی شێرپەنجە و بەڕێوبەری نەخۆشخانەی نانەكەلی بە ڕۆژنیوزی ڕاگەیاند: یەکێک لە هۆكارەکانی تووشبوون بە شێرپەنجە لە هەرێمی کوردستان پیسبوونی ژینگەو هەڵمژینی دووكەڵی ئۆتۆمبێل و پاشماوەی کارگەو پاڵاوگە نایاساییەکانە.
هەروەها ئەوەشی ئاشکرا کرد، یەکێک لە دیارترین ئەو جۆرانەی نەخۆشی شێرپەنجە، كە هاووڵاتیانی هەرێم توشی دەبن، شێرپەنجەی سییەكانە کە ڕاستەوخۆ پەیوەندی بە دوکەڵ و هەواوی پیسەوە هەیە.
بەپێی دوایین ئاماری وەزارەتی تەندروستی حكومەتی هەرێم، ساڵی ٢٠١٨ پێنج هەزار و ٦٥٨ حاڵەتی توشبوون بە نەخۆشی شێرپەنجە لەهەرێمدا تۆماركراوە و لەچاو ساڵی پێشتریشدا ٦٦٧ حاڵەت زیادیكردوو.
بەپێی دوایین ئاماری نەخۆشخانەی نانەكەلی هەولێریش، لە ماوەی شەش مانگی یەكەمی ئەمساڵدا نزیكەی ٩٦٤ كەس بۆ پشكنین سەردانی نەخۆشخانەكەیان كردووە، لەو ژمارەیەش ٤٨٥ حاڵەتی توشبون بە شێرپەنجە تۆماركراوە.
بە بڕیارێکی ئەنجومەنی وەزیرانی هەرێمی کوردستان بۆ پاڵپشتی لیژنەکانی لابردنی پاڵاوگە نایاساییەکان، هێزێکی هاوبەشی تایبەت دروستکراوە، بۆ ئەوەی تەواوی پاڵاوگە نایاساییەکانی هەرێم دابخرێن، ئەوەش پاش ئەوە دێت کە ساڵانێکە بەشێک لە پەرلەمانتاران و ڕێکخراوەکانی ژینگە داوای لابردنیان دەکەن.
ئەنجومەنی پارێزگای هەولێر و سلێمانی و پەرلەمانی کوردستانیش، کۆکن لەسەر داخستنی ئەو پاڵاوگانە و دەڵێن گەر بێت و کاری ئەو لیژنانە بە باشی بەڕێوە نەچێت ئەوا هەڵوێستیان دەبێت.
جگە لە پیسکردنی ژینگە، ئەم پاڵاوگانە سەرچاوەی بەرهەمهێنانی بەرهەمێکی سوتەمەنی بێ کوالێتین و زۆرینەی سوتەمەنی کوالێتی خراپ لەم پاڵاوگە نایاسییانەدا بەرهەم دەهێندرێن.
س.ح
