ئاگركەوتنەوەکان كاریگەری لەسەر ژینگەو خاك و بەرهەم هێنان جێدەهێڵێت

لە سنووری گەرمیان ڕێژەیەكی زۆر دەغڵودان و پووش و پاوان سووتاوەو بەڕای پسپۆڕانی ژینگە، جگە لەوەی كاردەكاتە سەر كەم بوونەوەی بەرهەمی ساڵانەی دانەوێڵە، ئاگركەوتنەوە كاریگەری ڕاستەوخۆو ناڕاستەوخۆ لەسەر ژینگەش جێدەهێڵێت.


لەسنوری گەرمیان ئەمساڵ تائێستا ژمارەیەكی زۆر ڕووداوی ئاگر كەوتنەوە ڕوویانداوە بەهۆیانەوە ڕووبەرێكی زۆر زەوی كە پێكهاتووە لە دەغڵودان و پووش و پاوان ئاگری گرتووەو سووتاون، ئەم ڕووداوانەش كاریگەرییان هەیە لەسەر بەپیتی خاك و كەم بوونەوەی ئاژەڵی كێوی و گیانلەبەران و تێكچوونی ژینگەو سرووشتی ئەو ناوچانەی ڕووداوی ئاگر كەوتنەوە تێیاندا ڕوودەدات.

بەپێی ئامارێك كە بەڕێوەبەری كشتوكاڵی گەرمیان ئاشكرای كردووە، ئەمساڵ لەگەرمیان نزیكەی ٣٥٠٠-٤٠٠٠ دۆنم زەوی كشتوكاڵی سووتاوە و نزیكەی ١٠٠٠-٢٠٠٠دۆنم  پووش و پاوانیش سووتاوە، ئەمانەش کاریگەریی نەرێنیان درووستکردووە.

دورید سەلیم، بەڕێوەبەری فەرمانگەی ژینگەی گەرمیان، باس لەوەدەكات:"كەوتنەوەی ئەو هەموو ئاگرە زیانێكی زۆری ڕاستەوخۆ و ناڕاستەوخۆی بۆ سەر ژینگە هەیە، زیانە ڕاستەوخۆكان خۆی لە بڵاوبوونەوەی گازە زیانبەخشەكاندا دەبینێتەوە وەكو گازی(كاربۆن دایوكساید و گازەكانی دیكە)لەكاتی ئاگر كەوتنەوەدا بڕێكی زۆر لەم گازانە بەهەوادا بڵاودەبنەوە كە هۆكارن بۆ زیاتر گەرمبوونی زەوی، وە دەبێتە هۆی لەناو چوونی ئاژەڵی كێوی و گیانلەبەران و تێكچوونی هێلانەو شوێنەكانیان".

لەبارەی زیانە ناڕاستەوخۆكانیش بەڕێوەبەری فەرمانگەی ژینگەی گەرمیان باسی لەوەكرد:"هەمو ئاژەڵ و گیانلەبەرەكان كان پێویستیان بە خواردن هەیە، بە سووتانی پووش و پاوان، ئەو خۆراكەی پێویستە نامێنێ‌، ناچاردەبن لەپێناو دەستكەوتنی خواردن كۆچ بكەن بۆ شوێن و ناوچەیتر، ئەمەش كاردەكاتە سەر باڵانسی مانەوەو ژیانی گیانلەبەران".

هەروەها شادیە حسێن، بەڕێوەبەری گشتی بەڕێوەبەرایەتی كشتوكاڵی گەرمیان، دەربارەی کاریگەریی ئاگرکەوتنەوەکان وەها قسەیکرد: بەشێوەیەكی گشتی ڕووداوی ئاگر كەوتنەوە بۆ ساڵی داهاتوو زیان و كاریگەری لەسەر خاك دەبێت و مەترسی سەوز نەبوون‌ دروست دەكات بۆ بەرهەمێهینانی دانەوێڵە و تووشبوونی بەچەند نەخۆشییەك، هەروەها كاریگەری دەبێت لەسەر كەمبوونەوەی بەرهەم.

س.ح