ئەمساڵ شارەزوور بەرهەمی گەنم و سەوزەی كەمدەبێت

باران بارینی زۆر زیانی لە گەنم و بەروبوومی سەوزە و شووتی و کاڵەکی ئەمساڵی دەشتی شارەزوورداوە، چاندنی هەندێکیشیانی دواخستووە و جوتیارانی سنورەکەش دەڵێن: چاوەڕوان دەکرێت بەرهەمی ئەمساڵیان کەمبێت، بەرپرسانی كشتوكاڵی سنورەكەش جەختدەکەنەوە کە بەرهەمی ئەمساڵی جوتیاران زیانی زۆری بەردەکەوێت.


لەسنوری شارۆچکەی شارەزوور و سەیدسادقی سەر بە پارێزگای سلێمانی، ئەمساڵ زیاتر لە هەزار ملیم باران باریووە، ئەو ڕێژە زۆرەی بارانبارین و بەتایبەت بارانبارین لەمکاتەدا زیانی زۆری بە دانەوێڵە و سەوزەی  سنورەكە گەیاندوە و بەرهەمەکانی دواخستووە ئەوەش گرفتی بۆ جوتیارانی سنوری دەشتی شارەزوور دروستکردووە.

دەشتی شارەزور، لەدامێنی پارێزگای هەڵەبجەوە بە سەیدسادق و شارەزوور تا نزیك شارەدەێی عەربەت درێژدەبێتەوە، ڕووبەری زەوییە كشتوكاڵیەكانی زیاتر لە 500 هەزار دۆنم زەوی كشتوكاڵییە، بەیەكێك لەبەپیت ترین دەشتەكانی هەرێمی كوردستان دادەنرێت دەتوانرێت چەندەها بەربوومی جۆراوجۆری تێدا بەرهەم بهێنرێت.

بەشێک لەو جوتیارانەی سەرقاڵی گەنمن لەبارەی بەرهەمەکەیانەوە قسەیان بۆ ڕۆژنیوز کرد، عوسمان حەمەساڵح، جوتیارێکی گوندی مالوانی سەر بەشارۆچكەی  شارەزوورە و لەوبارەیەوە وتی: "بەهۆی زۆری باران بارینەوە بەرهەمی گەنمی ئەمساڵ باشنابێت، چونکە بەشێكی زۆری فەوتاوە و نەخۆشە گژوگیاو خەرتەلەی زۆرە، بەشێكیشی  سن و كیسەڵەی هەیە، چونکە باران دەرفەتی نەداین دەرمانی بكەین، داواكارین حكومەت قەرەبومان بكاتەوە چونكە زیانێكی زۆرمانكردوە من گەنمەكەی خۆمم بەرەڵاكردوە".

سەربەست سلێمان، جوتیارێکی دیكەی گوندی كانی كەوەی چوخە و وتی: بەهۆی زۆری باران بارینەوە گەنمی دەشتی شارەزوور ئەمساڵ هیچ بڕشتێكی نیە، بووە بەژێر بژاری خەرتەلە، چاوبازە، قەلاسو، هەروەها سن و كیسەڵەش پەیدا بووە ئەوەش زیانێكی زۆری بەگەنمی جوتیاران گەیاندوە و هیچ ساڵێكیش بەئەندازەی ئەمساڵ زیانمان پێنەگەشتوە.

لای خۆیەوە عوسمان كەریم، جێگری بەڕێوەبەری كشتوكاڵی شارۆچكەی شارەزوور، بە ڕۆژنیوزی ڕاگەیاند: ڕێژەیەكی زۆر باران باریووە لەسنوەكەماندا، زیانی هەبوو بۆ بەرهەمی دانەوێڵە، ئێستا كۆمەڵێك نەخۆشی پەیدا بووە وەك ژەنگی گەنم و بوونی مێروویی سن لەناو گەنمدا، هەروەها گەنمیش بووە بەژێر بژارەوە، بەرهەمی شارەزوور هیچ وەك ساڵان باش نیە.

داواشی لەجوتیارانکرد هاوكاریان بن سەردانی كێڵگەكانی خۆیان بكەن، "ئەگەر حاڵەتێك یان نەخۆشییەك شتێك هەبوو ئاگادارمان بكەنەوە بۆ ئەوەی بەدەمیانەوە بچین بتوانین هاوكارییان بكەین".    

جگە لە گەنم زەوی شارەزوور خاکێکی بە پیتە بۆ بەرهەمهێنانی شووتی و کاڵەک و بەرو بوومی سەوزە، بەڵام وەک جوتیاران دەڵێن بارانبارینی زۆر ئەو بەرهە مانەشی دواخستووە، لەو بارەیەوە عەتا حەمەساڵح جوتیارێكی گوندی تەپەڕەشی سەر بەشارۆچكەی سەیدسادقە وتی "ئەمساڵ بەهۆی زۆری باران بارینەوە چاندنی بەرهەمەكانمان لەشوتی و كاڵەك وتەماتە لەكاتی خۆیدا دواكەوتووە، ئەوەش كاریگەریی لەسەر پێگەیشتنی بەرهەمەكانمان دەبێت".

وتیشی: بەرهەممان پێدەگات، بەڵام دوادەكەوێت و ڕێژەی بەرهەمەكەش كەمدەبێت، ساڵانی ڕابردوو لەمكاتەدا شوتی بەری گرتبوو بەڵام ئەمساڵ تازە خەریكی ناشتنین، هەرچەندە بەهەمەكانمان دوا دەكەوێـت، بەڵام داواكارین لەكاتی پێگەشتنی بەرهەمەكانماندا، حكومەت لەدەروازە سنورییەكانەوە ڕێگە نەدات شوتی هاوردە بكرێت بۆ ئەوەی زیانی زیاترمان پێنەگات.

شەمسە هەورامی، ماوەی چەندین ساڵە وەک پیاوان كار دەكات قسەی بۆ ڕۆژنیوز كرد و وتی: "بەزمانی بەڕۆژوە بەیانیان كاتژمێر ٦ی بەیانی دێینە سەر كارەكەمان، هەندێك كات تاكاتژمێر ١٢ كاردەكەین و بڕی ١٠ هەزارمان دەدەنێ ئەگەر تاكاتژمێر ٤ی ئێوارەش كار بكەین، شەتڵو ناوكی شوتی دەنێژین بڕی ٢٠ هەزارمان دەدەنێ".

عوسمان فەرەج بەڕێوەبەری كشتوكاڵی سەیدسادق بەوەكالەت، بۆ ڕۆژنیوز، وتی "بەرهەمی سەوزەوات شوتی، تەماتە، باینجان و بەرهەمەكانی دیكە، ئەمساڵ بەهۆی ڕێژەی زۆری باران بارینەوە چاندنەكەی دوا كەوتووە، بەوهۆیەشەوە بەرهەم لەدەشتی شارەزور ئەمساڵ كەمدەبێت".

وتیشی "باران بارین هیچ دەرفەتێكی ئەوەی نەداوە جوتیاران زەوییەكانیان ئامادە بكەن بۆ چاندن، تائێستاش زۆربەی ئەو شەتڵانەی دانراون لەلایەن جوتیارانەوە دانەچێنراوە، "ساڵی پار لەم كاتەدا بەرهەمی شوتی هەڵاڵە و گوڵی گرتبوو بەرهەم زۆر باشبوو، بەڵام ئەمساڵ تازە ئامادەكاریی دەكرێت بۆ چاندنەكەی".

ک.س