ئەگەر وا بڕوات گەرمیان دەبێتە بیابان

لە سنوری كەلار لە گەرمیان ڕێژەی سەوزایی بەپێی پێویست نییە، شارەزایانیش دەڵێن، ئەگەر وا بڕوات لە ١٥ ساڵی داهاتوودا گەرمیان ژیانی تێدا نامێنێت و دەبێتە بیابان.


لە ئێستادا ڕێژەی سەوزایی لە سنوری شارۆچكەی كەلار لە گەرمیان لە ٨% كەمترە، ئەوەش زۆر دوورە لە ستانداری جیهانییەوە، كە پێویستە ڕێژەی سەوزایی لە هەر شار و شارۆچكەیەك لە ٢٥% كەمتر نەبێت.

سیروان ساڵح، جوگرافیناس لە شارۆچكەی كەلار، بۆ ڕۆژنیوز باسی لەوە كرد: بەپێی ستانداردی جیهانیی پێویستە ڕێژەی سەوزایی لە هەر شوێنێك لە سەدا ۲٥ كەمتر نەبێت، بەڵام لە شارۆچكەی كەلار و دەوروبەری لە 8% كەمترە، ئەوەش مەترسیدارە و هۆكاری سەرەكیش خەمساردی حكومەتە.

باس لەوەش دەكات: ئەگەر ڕێژەی سەوزایی زیاد نەكرێت، ئەوا بەپێی لێكۆڵینەوەكان لە ۱٥ساڵی داهاتوودا گەرمیان دەبێتە ناوچەیەكی بیابانیی و لە وەرزی هاویندا ژیان تیایدا نامێنێت، چونكە پلەكانی گەرما زۆر بەرزدەبێتەوە.

لەلایەكی ترەوە، ئیبراهیم زەریفی، بەرپرسی ڕێكخراوی ژینگەپارێزی گەرمیان ئاماژەی بۆ ئەوە كرد: ئێمە وەكو ڕێكخراوەكەمان، شانبەشانی بەڕێوبەرایەتی ژینگە و شارەوانی و دارستان و پاوان، زیاتر لە۲۰ هەزار نەماممان چاندووە، بەڵام بەهۆی گڕە و بەرزی پلەی گەرما و كەمی ئاو، ٢٠% ئەو دارانە فەوتاون.

ئەوەشی وت: بۆیە زیادكردنی ڕێژەی سەوزایی لە كەلار كارێكی زەحمەتە، لایەنی پەیوەندیداریش لە ئاستی وەزیر و وەزارەت، گرنگی بە سنوری گەرمیان نادەن و هەست بەم كارەساتە ژینگەییە ناكەن.

هەر لەو بارەیەوە، دورەید سەلیم، بەڕێوبەری ژینگەی گەرمیان ئەوەی خستەڕوو: ئێمەش هەست بەو مەترسییە دەكەین، هۆكاری سەرەكیش بۆ كەمیی ڕێژەی سەوزایی ئەوەیە، كە پێش قەیرانی دارایی بە چڕی كاری بۆ نەكراوە، هەوڵەكانی ئێمە بەردەوامە و لە ئێستادا لەگەڵ شارەوانی كەلار و سەرۆكایەتی گشتی شارەوانییەكانی گەرمیان لە دانوستانداین بۆ دیاریكردنی ڕووبەر و دانانی پلان بۆ دروستكردنی پشتێنەی سەوز.

وتیشی: یەكێك لەو پرۆژانەی كە ئێستا دەستمان داوەتێ و كاری لەسەر دەكەین پرۆژەی ئابوری سەوزە، كە نزیكی ۷۲۰ كارگە و پرۆژەی جۆراوجۆر هەیە لە سنوری ئیدارەی گەرمیان، كە لەلای ئێمە مۆڵەتیان وەرگرتووە، ئێمەش سەپاندوومانە بەسەریاندا هەریەكەیان دەبێت ٢٥% سەوزایی هەبێت لە ڕووبەرەكانیاندا.


ك.ك