بارینی تەرزە زیان بە سەدان دۆنم زەوی کشتوکاڵی كەركوك دەگەیەنێت

بەهۆی بارینی تەرزەوە لە شاری كەركوك، زیانێكی زۆر بەر سەدان دۆنم زەوی بەرهەمی کشتوکاڵی جووتیارانی سنوری كەركوك كەوتووە، جوتیارانیش داوا دەکەن حكومەت قەرەبوویان بکاتەوە.


ئێوارەی چوارشەممەی ڕابردوو لە چەند ناوچەیەكی شاری كەركوك بۆ ماوەی شەش خولەك تەرزە بەشێوەیەكی بەلێزەمە باریی و بە هۆیەوە زیانی زۆر بە چەندین دۆنم بەرهەمی كشتوكاڵی جوتیارانی چەند ناوچەیەكی شارەكە كەوت.

بە لێزمە بارینی تەرزەکە زیانی بە ڕەز و باخی جوتیاران و گەنم و جۆ، لە سنوری شارەدێیەكانی شوان، قەرهەنجیر و لەیلان گەیاند.

محەمەد عەلی، جوتیارە لە گوندی حەسار لەبارەی زیانەکانەوە بۆ ڕۆژنیوز دواو وتی: "تەرزەیەكی بەخوڕ باری كە لە كەركوكەوە بەرەو ناوچەكەی ئێمە هات، لێرەش بەشێوەیەكی زۆر دەخڵودانی كوتاوە تا نزیك شارەدێی شوان، تەنها لە گوندەكەی ئێمە سەروی ١٥٠٠ دۆنم گەنم جۆی كوتاوە، هەر دۆنمێك نزیكەی تەنێك بەرهەمی دەبێت هەر تەنێک جۆ بە ٣٠٠ هەزار دینار و گەنم بە ٤٠٠ هەزار دینار دەخەمڵێنرێت، بۆیە زیانی زۆرمان بەركەوتووە".

وتیشی: "جووتیار هەیە تاوەكو ئێستا پارەی كێڵانی زەویەكەی نەداوە وە پارەی كیمایی نەداوە، جوتیار هەیە زەوەییەكەی بەكرێ گرتووە، بەڕاستی خەڵكی زیانی زۆری بەركەوتوە، بۆیە داوكارین لە حكومەتی هەرێم و عێراق قەربوومان بكاتەوە".

رەئوف ستار، ئەنجومەنی گوندی دوبزنی و جوتیار لەسەر هەمان پرس بەمشێوەیە قسەی کرد "خەڵكی ئەم ناوچەیە بەهۆی بارینی تەرزەوە زەرەێكی زۆری بەركەوتووە بەرهەمی زۆری دەغڵوجۆی كوتاوە بەهۆی ئەوەی گوڵی گەنم و جۆ وشك بووە زۆربەی لەناوچووە و کەوتووەتە سەر زەوی"

ئاماژەی بۆ ئەوەشکرد کە، بەشی زۆر جوتیاران بە قەرز زەوییەکانیان کێڵاوە، بەڵام بەهۆی تەرزەکەوە نەیانتوانیوە بەرهەمەكانیان دروێنەبکەن، ئەوەشی خستەڕوو کە "خۆم كیمیایم بە قەرز هێناوە و جووتی زەوەییەكەم كردووە هەر بە قەرز و یەك دینارم نەداوە، هەر چاوەڕێی ئەوە بووم كە دەڕاسە بێت درەو بكەم تا قەرزەكە بدەمەوە، جوتیار هەیە لەسنوری گوندی ئێمە ١٠٠ دۆنم زەوی تۆو كردووە و سەرجەمی كوتراوە تەنها پوشەكەی بۆ ماوتەوە، جوتیاری وەها هەیە بەرهەمانی سفر بووە و جوتیاری واش هەیە باشە چونكە تەرزەكە بە ڕەشەباوە بووە و چەند ناوچەیەكی گرتووەتەوە".

لە بەرامبەردا ئەحلام فەخرەدین، جێگری بەڕێوەبەری فەرمانگەی گشتی كشتوكاڵی كەركوك بە ڕۆژنیوزی، ڕاگەیاند: "دیارە ساڵانە بەشێوەیەكی گشتی تەرزەیەكی زۆر دەبارێت، بەڵام بە بەراورد بە ساڵەكانەی پێشتر ئەم ساڵ زیانەكانی زیاترە، ئێمە تا ئێستا بەهۆی ئەوەی كە دەوامی فەرمانگەكان كەمكراوەتەوە بەهۆی بوونی كۆرنا نەمتوانیوە زیانەكانی تەرزەكە بخەمڵێنین، بۆیە ڕۆژی یەكشەمە لە ڕێگای لیژنەیەكەوە سەردانی ئەو ناوچانە دەكەین كە زیانی بەركوتووە بە تایبەت لە سنوری شوان، قەرهەنجیر، لەیلان و پردێ، دوای ئەوەی لیژنەكە سەردانی مەیدانی ناوچەكە دەكەن زیانەكان ڕادەگەیەنین".

ڕوونیشیكردووە:"زیانەكان نەنزانراوە بەڵام بەگشتی زیانێكی زۆر بە بەرهەمی جۆ گەیاندووە بەوپێیەی ئێستا وەرزی وشكبوونی جۆیە ئەمەش وادەكات كە گوڵەكەی بەهۆی تەرزەوە بوەرێت ئەمە جگە لەوەی زیانێكی زۆریشی بە شوتی گەیاندوە".

ک.س