بەخێوکردنی ئاژەڵ بەشێوازی نادروست سیمای هەڵەبجەی تێکداوە

بەخێوکردنی ئاژەڵ بەشێوازی نا دروست و بەرەڵاکردنیان بۆسەر شەقام و کۆڵانەکانی شاری هەڵەبجە، جگە لەوەی ژینگەی شارەکەی تێکداوە، گرفتی زۆریشی بۆ شارەوانی دروستكردوە و سیمایەكی ناشرینیشی بەو پارێزگایە بەخشیووە، سەرۆكی شارەوانیش دەڵێت: هەوڵیانداوە ئەودیاردەیە بنبڕ بكەن، بەڵام سەركەتوو نەبوون، لە ڕۆژانی ئایندەشدا ڕێوشوێنەکان توند دەكەنەوە.


ئاژەڵداریی لەپارێزگای هەڵەبجە ئەگەرچی دیاردەیەكی باشی لەمێژینەی شارەكەیە، بەڵام بەخێوکردنی ئاژەڵ بە شێوازی نا دروست و بەرەڵاکردنی ئاژەڵەکان بۆسەر شەقامەکان و کۆڵانەکانی شاری هەڵەبجە، لەلایەن بەشێک لە خاوەن ئاژەڵەکانەوە، بووەتە هۆی تێکدانی ژینگەی شارەکە و ئەوەش هاوڵاتیان و چالاکوانان و بەرپرسانی شارەوانی نیگەران کردووە.

لەسەر ئەو پرسە ئەرسەلان عابد، سەرۆكی تۆڕی ڕێكخراوەكانی هەڵەبجە، بۆ ڕۆژنیوز، وتی "لەهەڵەبجەدا ژمارەیەك دیاردەی نەخوازراو هەیە كاریگەری خراپیان لەسەر سیما و ژینگەی شار هەیە، یەكێك لەو دیاردانە بوونی ئاژەڵی ماڵیە لەناو شەقام و پارك و شوێنە گشتییەكاندا، بەوهۆیەشەوە زیان بەژینگە و ناشیرینكردنی سیمای شاردەبەخشێت".

وتیشی: بنبڕكردنی هەر دیاردەیەكی نەخوازراو بە ڕۆژێک و دوو ڕۆژ نابێت، چەندین ساڵە كەسانی ڕۆشنبیر چالاكوان كەسانی ئیداری و ژینگەپارێز کار بۆ نەهێشتنی ئەو دیاردەیە دەكەن، بەوێنە و تكاو كەمپین هەوڵدراوە، بەڵام دەسەڵاتی ئیدارەی شارەكە وەك پێویست ڕێكاری توندی نەگرتۆتەبەر، بەحكومی هەندێك پەیوەندی كۆمەڵایەتی و ناسراویی هەندێك جاریش ڕەچاوی بەرژەوەندی ئاژەڵدارێك دەكرێت ئەوەش وایكردوە دیاردەكە بنەبڕ نەكرێت، کە كاریگەری لەسەر تێکدانی سیمای شارستانی شارەكە دروستكردوە.

لای خۆیەوە كوێستان ئەكرەم سەرۆكی شارەوانی هەڵەبجە، بۆ ڕۆژنیوز وتی: "بڵاوبونەوەی ئاژەڵی بەرەڵا تازە نیە بەڵكو ماوەی 10 ساڵە دیاردەكە بوونی هەیە، قۆناغ بەقۆناغ هەوڵمانداوە ئەودیاردەیە بنبڕ بكەین، بەڵام سەركەتوو نەبوین، لەبەرئەوەی هاوڵاتیان وەك پێویست هاوكارمان نین كێشە و گرفتمان بۆ دروست دەبێت لەكاتی دەستگیركردنی ئاژەڵەكاندا.

وتیشی: "ئەو ئاژەڵانەی بەرەڵا دەكرێن بەكۆڵان و شوێنەگشتەیەكاندا لەلایەن لیژنەكانمان دەست بەسەر دەكرێن، هەندێك جاریش مانگێك ئاژەڵمان لاماوەتەوە خزمەتمان كردوە خاوەنەكەی نەهاتووە بەلایدا، هەموو ئەوانەش گرفتن بۆ ئێمە، بەڵام ئێمە لەكارەكانی خۆمان بەردەوامین لیژنەكانمان زیاتر تونددەكەینەوە.

سەرۆكی شارەوانی هەڵەبجە ڕاشیگەیاند، چەند جارێك لەسەر داوای خاوەن ئاژەڵەكان ماوەی ڕوخاندنی گەوڕەكانمان بۆ درێژكردونەتەوە بەمەبەستی بردنە دەرەوەی ئاژەڵەكانیان، بەتایبەت ئەو ئاژەڵانەی كەوتونەتە نزیك بەڕێوەبەرایەتی گشتی پەروەردەی هەڵەبجەوە.

ئاشکراشیکرد کە "بەرنامەمان داناوە سەرجەم ئەو گەوڕانەی كەوتونەتە ناو مەركەزیی شارەوە لایان بەرین، سەرەتای ئەم هەفتەیەش بەشێك لەخاوەن ئاژەڵەكان ئاژەڵەكانیان دەگوازنەوە، دوای ڕوخاندنی ئەو گەوڕانەش قۆناغ بە قۆناغ تەواوی ئاژەڵەكان لەناو ناوەندی شاری هەڵەبجە دوردەخەینەوە".

سەرۆكی شارەوانی هەڵەبجە، جەختیشی كردەوە، لە ڕۆژانی ئایندەدا ڕێوشوێنەکان زۆر توندو چڕ دەكەنەوە، بۆ دەستگرتن بەسەر ئەو ئاژەڵانەدا و غەرامەكردنی خاوەنەكانیان، کە بۆ یەك سەر ئاژەڵی مانگای گەورە بڕی ١٠٠ هەزار دینارە و گوێرەكەش بڕی ٥٠ هەزار دینارە، بەڵام ئەو شوێنەشی ئاژەڵەكانی تێدا دەست بەسەر دەكرێت زۆرجار هاوڵاتیان قفڵەكەیان شكاندوە یان دیوارەكەی دەڕوخێنن و ئاژەڵەكانیان دەبەنەوە".

ک.س