بەرزیی نرخ و کەمی خزمەتگوزاریی گەشتیارانی هەورامان نیگەران دەکات

بەرزبوونەوەی پلەكانی گەرما گەشتیارێكی زۆری ڕاكێشاوە بۆ هاوینەهەوارەكانی هەورامان، بەڵام بەرزیی نرخ و کەمی خزمەتگوزاریی، گەشتیارانی نیگەران کردووە.


بەپێی ئامارێک، کە ڕۆژنیوز لە بەڕێوبەرایەتیی گەشتوگوزاری هەڵەبجەوە وەریگرتووە، لە یەکەم ڕۆژی جەژنی قوربانەوە هەتا ڕۆژی ٢٢ی ئەم مانگە، زیاتر لە ٦٠ هەزار گەشتیار سەردانی ناوچە گەشتیارییەكانی هەڵەبجە و هەورمانیان كردووە، هاتنی گەشتیارییش بەردەوامە.

هەورامان یەکێک لەو ناوچە گەشتیارییانەی، کە بەتایبەت لە وەرزی هاویندا گەشتیار رووی تێدەکات، ئەویش بەهۆی سازگاریی ئاو و هەوا و سەرنجڕاکێشیی سروشتەکەیەوە.

هەروەها، هەورامان بەرهەمی تایبەت بەخۆی هەیە، کە کڕیارێکی زۆر لەدەوری خۆی کۆدەکاتەوە، لەوانە گوێز، توو، کاری دەستیی، کڵاش و دەیان بەهەمی خۆماڵیی.

لەگەڵ هەموو ئەمانەشدا ناچە گەشتیارییەکانی هەورامان بێ کەموکورتیی نییە و بەرزیی نرخەکانیش هاوڵاتیان نیگەران دەکات.

تەرزە بەكر، یەکێک لەو گەشتیارانەیە، کە لە سلێمانییەوە چووەتە هاوینەهەواری ئەحمەد ئاوا لە هەورامان، لەبارەی نرخی کەپر و شمەکەکانەوە وتی:"نرخەکان زۆر بەرزن، كەپرێك دەگریت بۆ دانیشتن شەو ڕۆژێك 24 كاتژمێرە، بەڵام لای خاوەن کەپرەکان 12 كاتژمێرە، واتە دووجار كەپرەكە دەدەن بەكرێ‌".

نرخی کەپرەکان بەپێی گەورەیی بچووکیی دەگۆڕێت، نرخ لە ٢٠ هەزارەوە دەستپێدەکات هەتا ٦٠ هەزار، ئەو ڕۆژانەشی، کە پشووبێت و گەشتیار زیاتر بێت، نرخەکان گرانتر دەبن.

هەروەها، وەک گەشتیاران باسی دەکەن، نرخی شوێنی ڕاگرتنی ئۆتۆمبێل لەو ناوچانە ١٠ هەزار دینارە، لەکاتێکدا لە شوێنی ئاسایی تەنیا هەزار دینار وەردەگیرێت.

پیسی ژینگەکە گرفتێکی دیکەیە، چونکە بەشێکی گەشتیاران پاشماوەکانیان لە شوێنی خۆیان بەجێدەهێڵن یانیش فرێی دەدەنە سەر ڕێگاکان، وەک گەشتیارانیش باسی دەکەن، خاوەن باخەکان وەک پێویست باخ و کەپرەکانیان خاوێن ناکەنەوە.

شەماڵ جەوهەر، لە گەرمای گەرمیان وەڕەس بوو بوو، بۆ پشوویەک ڕووی لە هەورامان کردبوو، بەڵام ڕەخنەی لە کەمیی خزمەتگوزاریی ناوچەکە گرت و وتی: رێگاوبانەکەی وەک پێویست نییە.

نەبوونی کارەبا گرفتێکی دیکەی بەشێک لە ناوچە گەشتیارییەکانی هەڵەبجەیە و هەندێک لە خاوەن باخەکان بۆ دابینکردنی کارەبا بۆ گەشتیاران پەنایان بۆ مۆلیدە بردووە، لەوبارەیەشەوە، وەهاب ئەمین میكە، بەڕێوەبەری گەشتوگوزاری هەڵەبجە وتی: زۆربەی ناوچە گەشتیارەكانی هەڵەبجە زەوییەكانیان كشتوكاڵیین و سەر بەوەزارەتی كشتوكاڵن، پێویستە ئەو وەزارەتە پشتگیریی بداتە بەڕێوەبەرایەتی دابەشكردنی كارەبا، بەڵآم تا ئێستا وەزارەتی کشتوکاڵ ئەو کارەی نەکردووە.

وەهاب ئەمین بە پێویستی دەزانێت، ئەو کێشەیە چارەسەر بکرێت، وتیشی:"بۆنمونە زەڵم ناوچەیەكی گەشتیارییە، ناكرێت ئەو هەموو گەشتیارە ڕوی تێدەكات كارەبای نەبێت، كە داهاتێكی باشی بۆ هاوڵاتیانی سنوورەكە و حكومەتی هەرێمیش هەیە".

لەبارەی پاراستنی ژینگەی ناوچەکەوە، بەڕێوبەری گەشتوگوزاری هەڵەبجە، ڕوونیکردەوە"لە زۆربەی ناوچە گەشتیارییەكاندا تیمی تایبەت و كارمەندی جێگیرمان هەیە، ڕێنمایی دەدەنە خاوەن كەپر و گەشتیارەكان، بەڵام بەداخەوە ئەو كەسانەی خاوەن موڵكن ئەوەندەی بەدوای قازانجی خۆیانەوەن، ئەوەندە گرنكی بەپاك ڕاگرتنی ژینگەی ناوچەكە نادەن، لیژنەکانی ئێمە دەگەڕێن، هەر گەشتیارێك شوێنەكەی پیس بێت،یان پاشماوەكەی فڕێبدات بۆناو ئاوەكە، سزای مادییان دەدەین".

سەبارەت بە بەرزیی نرخەکانیش، وەهاب ئەمین، وتی، کە سزای سەرپێچیکاران دەدەن و گەشتیارانیشی ئاگادارکردەوە، کە لە ڕێگای پەیجی گەشتوگوزاری هەڵەبجەوە لە تۆڕی کۆمەڵایەتیی فەیسبووک، یانیش لەڕێگەی تەلەفۆنەوە ئاگادارییان بکەنەوە لە هەر سەرپێچییەک.

ش.ف