بەهۆی بڕینەوەی دارەوە خواست لەسەر سۆپای دار زیاتر بووە

بەهۆی ئەوەی نەوت بە کەمیی بەسەر هاوڵاتیاندا دابەش دەکرێت، خواست لەسەر سۆپای دار لە سنوری هەورامان زیاتر بووە، ئەوەش بەهۆی بڕینەوەی دارەوە، چالاکوانانی ژینگەش دەڵێن، ئەوە مەترسییەکی گەورەیە بۆ سەر ژینگە.


وەرزی زستان لە هەورامان سەختترە وەک لە ناوچەکانی دیکەی هەرێمی کوردستان، لەگەڵ ئەوەشدا حکومەت بە پێی پێویست نەوت بەسەر هاوڵاتیاندا دابەش ناکات، بۆ ئەوەش بەشێک لە هاوڵاتیان دار دەبڕنەوە.

نورى مەحمود، وه‌ستاى دروستکردنى سۆپاى دار له‌ هەڵەبجە دەڵێت: ئێمه‌ ڕۆژانه‌ سه‌رقاڵى دروستکردنى سۆپاى دارین و هه‌ر له‌ سه‌ره‌تاى وه‌رزى پایز ده‌ست به‌ دروستکردنى ئه‌م سۆپایانه‌ ده‌که‌ین،‌ هه‌ندێک جاریش له‌ سه‌ر خواستى هاوڵاتیان سۆپاکانیان بۆ دروست ده‌که‌ین.

باسی لەوەش کرد: ساڵ به ‌ساڵ فرۆشی سۆپاى دار ڕوو له‌ زیادبوون ده‌کات و ئەمساڵیش زیاتر بووە.

هاوسه‌ر محەمەد، ئه‌ندامى ڕێکخراوى ژینگه‌پارێزى کوردستان له‌ هه‌ڵه‌بجه،‌ باس لەوە دەکات: بڕینەوەی داری ناوچە شاخاوییەکان زیانێکی زۆری بۆ سروشت و ژینگەی ئەو ناوچانە هەیە.

ئەوەشی وت: پێویستە حکومەت ساڵانە بڕە نەوتی پێویست بەسەر هاوڵاتیاندا دابەش بکات تا ناچار نەبن پەنا ببەنە بەر بڕینەوەی دار و درەخت.

لەو بارەیەوە ئاوات محەمەد، سەرۆکی لیژنەی دابەشکردنی سوتەمەنی لە پارێزگای هەڵەبجە، ئەوەی خستەڕوو: ئەوان ساڵانە بڕی دوو بەرمیل نەوت دابەش دەکەن، به‌ڵام له‌ ئه‌مساڵدا تا ئێستا ته‌نها یه‌ک به‌رمیل نه‌وت دابه‌شکراوه‌ به‌سه‌ر هاوڵاتیانى سنوره‌که‌.

ک.ک