جبوری پشتیوانیی هێرشکردنە سەر گوندی پەڵکانە دەکات

ڕاكان جبوری پارێزگاری بەوەکالەتی كەركوك پشتیوانیی ئەو کەسانە دەکات، کە هێرشیان کردە سەر گوندی پەڵکانە و بەهانەیان بۆ دەهێنێتەوە و دەڵێت:"ئەو هاوڵاتیانەی كە لە پەڵکانە نیشتەجێن خەڵكی گوندەكە و كەركوك نین، بەڵكو ئێرانین و خەڵكی شاری مهابادن".  


ڕاكان جبوری پارێزگاری بەوەكالەتی كەركوك، دەربارەی دوایین دۆخی كەركوك و ئاڵۆزیەكانی گوندی پەڵكانە، ئەمڕۆ كۆنگرەیەكی ڕۆژنامەوانی لە بیای پارێزگای كەركوك ئەنجامدا.

جبوری، ڕایگەیاند:"ڕووداوەكەی گوندی پەڵكانە بەو شێوەیە نییە كە باسی لێوەدەكرێت، ئەو هاوڵاتیانە كە لە گوندەكە نیشتجەجێبوون خەڵكی پەڵکانە نین و ناسنمامەی كەركوكیان نیە، بەڵكو خەڵكی شاری مهابادی ئێرانن و هاتووتەنەتە گوندەكەن".

ڕاکان جبوری، ڕاستەوخۆ پشتیوانیی خۆی بۆ ئەو کەسانە نیشاندا، کە زەوی هاوڵاتیانی پەڵکانە داگیردەکەن و ڕایگەیاند:"ئەو هاوڵاتییە عەرەبانەی كە چوونەتە سەر گوندەكە، خەڵكی ڕەسەنی پەڵکانەن و زەوییەكانی ئەو گوندە موڵكی ئەوانە و تاپۆی ساڵی 1957یان هەیە، بۆیە من پاڵپشتی ئەو خێزانە عەرەبانە دەكەم".

وتیشی:"ئەو خێزانانە مادەی 140ی دەستوری عێراق نایانگرێتەوە، بەڵكو یاسای 117 كشتوكاڵی دەیانگرێتەوە من بەو یاسایە كار دەكەم و یاساكەش تاوەكو ئێستا لە عێراق كاری پێدەكرێت، بۆیە هەر كەسێك بەڵگەی هەیە با لە دادگا سكاڵا تۆمار بكات و ماف وەربگرێتەوە".

پارێزگاری بەوەكالەتی كەركوك، دەربارەی سووتانی دەغڵ و دانی جوتیاران لە سنووری پارێزگاکە، وتی:"سووتانی دەغڵی جوتیاران تەنها لە كەركوك ڕووینەداوە، بەڵكو تەواوی پارێزگاكانی عێراقی گردتووەتەوە بە تایبەت شاری بەغدا، بەداخەوە شەوی ڕابردوو لە داقوقیش دەغڵی جوتیاران سوتێنراوە، ئێمە ترسێكی گەوەرەمان هەیە، بەڵام بەگشتی ئێمە توانای كەممان هەیە بۆ ڕووبەڕووبوونەوەی ئەو حاڵەتانە بەو پێەی كە كەركوك سنورێكی فراوانی هەیە".

وتیشی:"هەر جوتیارێك دەغڵەكەی سوتا دەتوانێت داوای قەرەبوو بكات، تا ئێستاش هیچ ئامارێك نییە، كە نیشانی بدات چەند ڕووبەر زەوی دەغڵ سووتاوە".

دەربارەی دابەشكردنی پۆستەكانی كەركوك، پارێزگاری بەوەكالەتی كەركوك، ئاشکرایکرد:"بۆ دابەشكردنی پۆستەكانی كەركوك بە ڕێژەی %32 ڕاستەخۆ لەگەڵ یەكێتیدا لە پەیوەندییداین، لیژنەیەك لە ئەندامانی ئەنجوومەنی نوێنەرانی عێراق دروستكراوە لە هەر سێ نەتەوەكەی كەركوك، لە بەغداوە كار بۆ ئەو بابەتە دەكرێت، پارتی-ش لە لیژنەكە ئەندامی هەیە،  كۆی بابەتەكانی پەیوەست بە دابەشكردنی پۆستەكان لای سەرۆك وەزیرانی عێراقە".

ش.ف