داوا دەکرێت لە جەژندا ئاگاداری ژینگەبن بەتایبەت لەکاتی ئاگرکردنەوەدا

هەورامان یەکێکە لە دەڤەرە گەشتیارییەکانی باشوری کوردستان، لە بۆنەو پشووەکاندا هەزاران هاوڵاتی سەردانی دەکەن، گەشتوگوزاری پارێزگای هەڵەبجە وژینگە پارێزان داوا دەکەن، کە هەمووان ئاگاداری ئاگرکردنەوە بن و نەبنە هۆی زیانگەیاندن بە ژینگە و باڵندە و هەموو زیندەوەرەکانیتر.


هەورامان یەکێکە لە دەڤەرە گەشتیارییەکانی باشوری کوردستان، کە چەندین سەیرانگایان تێدایە و بەتایبەت لە بۆنەو پشووەکاندا هەزاران هاوڵاتی لە ناوچەکە و دەرەوە سەردانی دەکەن، گەشتوگوزاری ناوچەکە بۆ ئەم جەژنە ئامادەکارییان کردووە کە پێشوازیی لە گەشتیاران بکەن و پێیان وایە نزیکەی ٢٠ هەزار گەشتیار سەردانی دەڤەرەکە دەکەن، هەروەها گەشتوگوزار و ژینگە پارێزان داوا دەکەن گەشتیاران سروشت و ژینگەی سەیرانگاکان بپارێزن.

وەهاب ئەمین میكە بەڕێوەبەری بەڕێوەبەرایەتی گەشتوگوزاریی هەڵەبجە، ئاماژە بەوە دەکات، چەند ڕۆژێكە بەهاوبەشی لەگەڵ تەندروستی، ئاسایش، پۆلیس، پۆلیسی هاتووچۆ و بەرگری شارستانی هەموو ئامادەكارییەكانیان تەواو کردووە، دەشڵێت: فەرمانبەرانمان بەسەر لیژنەكاندا دابەشکردووە،  بۆ سەیرانگاكانی هەورامان، ڕێنماییمان پێداون چاودێری گەشتیاران بكەن ڕێنمایی تەواویان پێبدەن.

لە جەژندا تەواوی چێشتخانەو هۆتێلە گەشتیارییەکان کراوەدەبن، چونکە بە وتەی وەهاب ئەمین، پێدەچێت  لە دووەم ڕۆژی جەژنەوە تا کۆتایی نزیکەی ٢٠ هەزار گەشتیار لەناوچەكانی ناوەڕاست و خوارووی عێراق و ڕۆژهەڵاتی كوردستان و هەرێمی کوردستانەوە ڕوو لەناوچە گەشتیارییەكانی سنووری پارێزگای هەڵەبجەو هەورامان بكەن.

بەڕێوەبەری بەڕێوەبەرایەتی گەشتوگوزاریی هەڵەبجە داوای لە تەواویی هاوڵاتیان کرد، کە لە کاتی گەشتەکانیاندا ئاگاداری پاکڕاگرتنی ژینگەبن و نەبنە هۆی ناشیرینکردنی سیمای ناوچە گەشتیارییەکان.

هەروەها مەنزەر عەلی لێپرسراوی ناوەندیی كۆمەڵەی كوردستانێكی سەوز لەپارێزگای هەڵەبجە داوا دەکات هەمووان ژینگە بپارێزن و ئەو پاشماوانەی گەشتیاران لێیان دەمێنێتەوە بیكەنە حاوییەكانی ڕشتنی خوڵوخاشاكەوە بۆ ئەوەی ناوچە گەشتیارییەكانی بەپاكو خاوێنی بمێننەوە.

مەنزەر هۆشداریی دەدات و دەڵێت:"ئەوەی گرنگە لەم وەرزەدا ئەوەیە گەشتیاران سروشت بپارێزن بەوریاییەوە ئاگر بكەنەوە، چونكە ئەگەر بێت و ئاگریان لە دەسیت دەرچێت و پاش خۆیان نەیکوژێننەوە، دەبێتە هۆی زەرەرو زیانێكی زۆر بۆ ناوچەكە، چونکە دەبێتەهۆی ئەوەی ناوچەكە بنەما سروشتییەکانی لەدەستبدات".

ئەو ژینگە پارێزە ئاگادارنەبوون لە ئاگرکردنەوە بەهۆکاریی سووتانی درەخێتكی زۆر دەزانێت، کە دەبنە هۆی زیان گەیاندان بە باڵندە و هەموو زیندەوەرەکانیتر، دەشڵێت "دەبێت کاتێک کەسێک جگەرە دەکێشێت، زۆر بە وریاییەوە بیکوژێنێتەوە پاشان فڕێی بداتە شوێنی خۆڵ و خاشاک.

س.ح