دژی بۆردوومان و تۆپبارانەکان ژینگەپارێزان کەمپەین ڕادەگەیەنن

بە ئامانجی پاراستنی ژینگەی باشوری کوردستان و دژایەتییکردنی هێرشەکانی دەوڵەتی تورک، چوار ڕێکخراوی ژینگەیی لە شاری هەولێر کەمپەینێکیان ڕایگەیاند، بۆ راگرتنی هێرشەکان، بۆ ئەو مەبەستەش سەردانی کونسوڵخانەکانی تورکیا و ئێران لە هەرێم دەکەن، ڕێکخەرانی کەمپەینەکە دەشڵێن:"سەردانی ئەو پارتانەش دەکەین کە کراون بەبیانوو".


دژی بۆردوومانەکانی دەوڵەتی تورک و تۆپبارانەکانی ئێران، کە سنوورەکانی باشوری کوردستان دەکەنە ئامانج و زیانێکی زۆر گیانی و ژینگەیی و ماددیی بە هاوڵاتیان دەگەیەنن، ڕۆژی ١١ی ئەم مانگە هەریەکە لە'ڕێكخراوی ئاڤیاری هۆشیاریی ژینگە، ڕێكخراوی ئاف یا كوردستانی، ڕێكخراوی ژینگە پارێزی ئاژڵان و گروپی ژینگە پارێزی  كوردستان'، کەمپەینێکیان لەژێر ناونیشانی"نا بۆ تۆپبانكردنی ناوچە سنوریەكانی هەرێمی كوردستان"ڕایگەیاندووە.

بە وتەی ڕێکخەرانی کەمپەینەکە بۆ ڕۆژنیوز، سەرەتا  كەمپینەكە تەنها لەڕێگای تۆڕە كۆمەڵایەتییەكانەوە دەبێت و هاوڵاتیان بە بڵاوکردنەوەی هۆشیارییە ژینگەییەکان پشتیوانی لێ دەکەن، دواتر لە بەرنامەیاندایە سەردانی هەردوو كونسوڵخانەی توركیا و ئێران بكەن، بۆ ئەوەی داوایان لێبكەن "هێرشەکانیان ڕابگرن،  پاشان  سەردانی ئەو پارت و لایەنانە دەكەین كە  توركیا و ئێرانکردوونیان بە بیانوو بۆ هێرشەکان،  تاوەكو ڕێگا چارەیەك بدۆزرێتەوە بۆ ئەوەی زیان بە خەڵكی ناوچەكە و ژینگەی ناوچەكە نەكەوێت".

ئاسۆ شكاک، یەکێک لە رێ^کخەرانی کەمپەینەکە، وتیشی:"ئەگەر تۆپبارانەكان بەردەوامی هەبێت، دوای ئەوەی كابینەی نوێ بە فەرمیی و بەتەواویی دەستبەکاربوو، داوا لە وەزیری هەرێم بۆ كاروباری پەرلەمان دەكەین هەردوو سەر كونسوڵی ئێران و توركیا بانگهێشتی پەرلەمان بكات و لێپێچینەوەیان لەگەڵدا بكرێت، چونكە ناكرێت بەوشێوەیە ژینگەی هەرێمی كوردستان و هاوڵاتیان بكرێتە ئامانج".

س.ح