دەستەی ژینگە: ئاگاداری ئەو داهاتە نین بەناوی ژینگەوە لە شۆفێران وەردەگیرێت

شوفێران و هاوڵاتیانی شاری هەولێر، پێیانوایە ئەو بڕە پارەیەی لەكاتی مامەڵەی ئوتۆمبێلەكانیاندا بۆ ژینگە و ڕێگاوبان لێیان وەردەگیرێت، خزمەتی ژینگە و چاككردنی ڕێگاو بانەكانی نەكردووە، وتەبێژی دەستەی پاراستن و چاكردنی ژینگەی هەرێمیش دەڵێت: ئاگاداری ئەو داهاتە نین كە بەناوی ژینگەوە لە شوفێران وەردەگیرێت.


بەبڕیارێكی ئەنجومەنی وەزیرانی هەرێمی كوردستان ماوەی چوار ساڵە بەڕێوەبەرایەتی گشتیی هاتووچۆی هەرێمی كوردستان لە بەرامبەر هەر مامەڵەیەكی تۆماركردن و كاروباری ئۆتۆمبێل پارەی ژینگە و ڕێگاوبان لە شوفێران وەردەگرێت، شوفێرانی شاری هەولێر-یش لەڕێگای ڕۆژنیوزەوە بۆچوونی خۆیان لەسە وەرگرتنی ئەو بڕە پارەیە و لە بەرامبەریشدا ڕێگاوبانەکان دەخەنەڕوو.

نەجمەدین محەمەد، یەکێک لەو شۆفێرانەیە و باسی لەوە کرد، پارەیەكی زۆر بەناوی ژینگە و ڕێگاوبانەوە لە شوفێران وەردەگیرێت، بەڵام ڕێگاكان هەمووی تاسە و چاڵن، وتیشی: ئەگەر ڕێگاوبان چاك بكرێت پارەش بدەین ئاساییە، بۆیە پێویستە حكومەت ئەو بڕە پارەیەی لە ڕێگاوبانەكان خەرجبكات.

كەمال عوسمان، شوفێركی تری هەمان شارە و پێوایە تا ئێستا ئەو بڕە پارەیەی لە شۆفێران وەرگیراوە، هیچی بۆ ڕێگاوبانەكان نەبووە، خوازیاریشە لە كابینەی داهاتووی حكومەتی هەرێمی كوردستاندا ئەو پارەیە بۆ ڕێگاو بان و ژینگە خەرج بكرێـت.

لەسەر وەرگرتنی پارەی ژینگە و ڕێگاوبان هاوڵاتیانی شاری هەولێر، جگە لە شۆفێران هاوڵاتیانی دیکەش قسەی خۆیان هەیە و لەو چوارچێوەیەدا، كامەران عەلی، هاوڵاتی ، وتی: پێویستە تەواوی ئەو پارانەی بۆ ژینگە و رێگاو بان وەدەگیرێت لە خزمەتكردنی خەڵكیدا خەرجبكرێت، بە تایبەت ڕێگاو بانەكانی دەرەوەی شار و گوندەكانی پێ چاكبرێن.

ئەگەرچی ئەو پارەیەی لە شۆفێران وەردەگیرێت بەناوی ژینگەوەیە، بەڵام دەستەی پاراستن و چاككردنی ژینگە ئاگاداری داهاتەكەی نین و لەو بارەیەوە هەندرێن شێخ راغب، وتەبێژی دەستەی پاراستن و چاكردنی ژینگەی حكومەتی هەرێمی كوردستان، بە ڕۆژنیوزی ڕاگەیاند: وەكو دەستەی پاراستن و چاكردنی ژینگە بە شێوەیەكی فەرمی ئاگاداری ئەو داهاتە نین  كە بەناوی ژینگەوە لە شوفێران وەردەگیرێت و ئەوە تەنها وەزارەتی ناوخۆ و ئەنجومەنی وەزیران ئاگاداری ئەو پرسەن.

 ڕاشیگەیاند: لە چەند ساڵی ڕابردوو حكومەتی هەرێم بە هۆی قەیرانی داراییەوە بەشێكی ئەو پارەیەی بۆ موچەی فەرمانبەران تەرخان دەكرد ئێمەش وەكو دەستە چەندین جار داوامان كردوە كە بڕێك لەو پارەیەی بەناوی ئێمەوە وەردەگیرێت بخرێتە سندوقی ژینگەوە، بەڵام تاوەكو ئێستا داواكەمان جێبەجێی نەكراوە.

لە بەڕێوەبەرایەتیەكانی هاتووچۆ لە هەرێمی كوردستان بۆ هەر مامەڵەیەكی تۆماركردن و كاروباری ئۆتۆمبێل بڕە پارەیەك بەناوی ژینگە و ڕێگاو بانەوە وەدەگیردرێت، كە بەم شیۆەیەیە، بۆ ئۆتۆمبێلی تایبەت بڕی ٧٥ هەزار دینار، بۆ ئۆتۆمبێلی كرێ (تەكسی) ١٧٥ هەزار دینار و بۆ ئۆتۆمبێل بارهەڵگر بڕی ٣٥٠ هەزار دینار وەدەگیرێت.

ك.س