سلێمانی، ١٠ هەزار بەڕوو لە چیای ئەزمڕ و گۆیژەی دەڕوێندرێت

لە چیای ئەزمڕ و گۆیژەی شاری سلێمانی، نزیكەی ١٠ هەزار بەڕوو دەڕوێنرێت و هەفتەی داهاتوو هەڵمەتێكی فراوان بە چاندنی هەزاران بەڕوو بەڕێوە دەچێت، قائیمقامی شارەكەش ڕایگەیاند: ئەمە هەنگاوێكی گەورەی نیشتمانییە و ئامانج لێی پاراستنی ژینگەو زیاتر سەوزكردنی چیای ئەزمڕ و گۆیژەی شاری سلێمانی .


ئەمڕۆ، ئاوات محەمەد قائیمقامی سلێمانی لە چیای ئەزمڕ و گۆیژەی شاری سلێمانی هەڵمەتێكی فراوانی بەڕوو ناشتنی بەسەركردەوە كە لەلایەن بەڕێوەبەرایەتی دارستان و پوش و پاوانی سلێمانی و قائیمقامیەتی سلێمانی سەرپەرشتی دەكرێت.

ئامانج لە هەڵمەتەكە زیاتر سەوزكردنی ڕووبەڕووی سەوزاییە لە چیای گۆیژە و پاراستنی ژینگەی شاری سلێمانیی، بڕیارە لە ماوەی چەند هەفتەیەكدا نزیكەی ١٠هەزار بەڕوو بڕوێنرێت.

لە میانەی بەسەركردنەوەی هەڵمەتەكەدا ئاوات محەمەد قائیمقامی سلێمانی رایگەیاند: چیایی ئەزمڕ و گۆیژە بەشێكی گرنگن لە سیماو ژینگەی شاری سلێمانی و هەڵمەتەكەش هەنگاوێكی گرنگ و پێویستە بۆ پاراستنی ژینگە و زیاتر سەوزكردنی رووبەڕووی سەوزایی لە هەردوو چیای ئەزمڕ و گۆیژ.

ئاماژەی بەوەشكرد، قۆناغی یەكەمی هەڵمەتەكە دەستی پێكردووە كە هەڵكەندنی چاڵەكانەو هەفتەی داهاتووش هەڵمەتێكی فراوان دەستپێدەكات بۆ چاندنی هەزاران بەڕوو.

س.ح