لەسەر تێكدانی سروشتی كوردستان بڕینەوەی داراستانەكان لەلایەن دەوڵەتی داگیركەری توركەوە، سەرۆکی پارتی سەوز ڕایدەگەیەنێت، بەردەوام چاودێری پێشێلکارییەکان دەکەن و سکاڵا تۆمار دەکەنەوە.
کۆمپانیای جەنگیزی تورکی کە دەوڵەتی داگیرکەری تورک خاوەنداری دەکات، ماوەی ساڵانێکە دەستی داوەتە بڕینەوەی دارەکانی کوردستان و هەرێمی بادینان و بە بەرچاوی پەدەكەوە ژینگەی کوردستان تاڵان دەکەن.
لەسەر ئەو ڕووداوە، پارتی سەوزی کوردستان، لە ماوەی ڕابردوو بە هەماهەنگی چەند ڕێکخراوێکی دیکە سکاڵایی یاسایان تۆمارکرد دژ بە دەوڵەتی داگیرکری تورک و کۆمپانیای جەنگیز لە نوێنەرایەتیی نەتەوە یەکگرتووەکان، وەک خۆیان دەڵێن: هەتا ئێستا وەڵام نەدراونەتەوە، بەڵام کۆڵ نادەن و بەردەوام دەبن لە سکاڵا تۆماردکردن.
ملکۆ بازیانی، سەرۆکی پارتی سەوز بە ڕۆژنیوزی وت: لە ماوەکانی ڕابردوو پارتی سەوزی کوردستانی، لە گەڵ ڕێکخراوەکانی دیکەی کۆمەڵگەی مەدەنی، لە شاری سلێمانی سکاڵایی یاساییمان تۆمارکرد لە نەتەوە یەکگرتووەکان، دژ بە دەوڵەتی تورکیا و کۆمپانیای جەنگیزی تورکی، کە کاریان بڕینەوەی دار و تێکدانی سروشتی هەرێمی کوردستانە بە تایبەت لە سنوری هەرێمی کوردستان، بە داخەوە هەتا ئێستا هیچ وەڵامێکیان نەداوینەتەوە، تورکیا و کۆمپانیاکە هەتا ئێستا بەردەوامن لە بڕینەوەی دارەکانی کوردستان.
ملکۆ بازیانی ئاماژەی بەوەشکرد، ئامانجی دەوڵەتی تورکیا تێکدان و شێواندنی سروشتی هەرێمی کوردستانە، هەمان کات دەیەوێت هەموو ئەو ناوچانە چۆڵبکرێن، بەدواداچونەکانی ئێمە بەردەوامە، ئەگەر هەر وەڵام نەدرێینەوە جاریکی دیکە لە نەتەوە یەکگرتووەکان و دادگای مافی مرۆڤ لە ئەوروپا سکاڵا تۆمار دەکەین و تەواوی ڕێکخراوە ژینگەییەكان لە جیهان ئاگادار دەکەینەوە.
داوای لە حکومەتی هەرێمی کوردستان و عێراق كرد هەڵوێست بنوێنن و ڕێگریی لە لەشکرکێشییەکانی دەوڵەتی تورکیا بکەن و ڕێگە نەدەن توركیا سنووری عێراق ببەزێنن، وتیشی: بە تەینا دارەکان نییە بەڵکو چەندیین ئاژەڵی کێویی بە هۆی بۆردوومانەکانی تورکیاوە لە ناوچوون.
س.س
