بەڕێوەبەری گشتی كشتوكاڵی گەرمیان ڕایدەگەیەنێت، لە ئەنجامی ئەو بڕە باران بارینەی لەم مانگەدا باریوە، لەسنوری ئیدارەی گەرمیان پەڵەی داوە و پێشبینی دەكات، ئەمساڵی گەرمیان تەڕە ساڵ بێت و ڕزگاریان ببێت لە وشكە ساڵی.
لە ۲٥ ئەم مانگەدا شەپۆلێکی باران بارینی باش سنوری ئیدارەی گەرمیانی گرتەوە و بە وتەی بەڕێوەبەری كشتوكاڵی گەرمیان بەهۆی زۆری ڕێژەی بارانەكەوە پەڵە داویەتی لە سنورەكەدا.
شادیە حسێن، بەڕێوەبەری بەڕێوەبەرایەتی گشتی کشتوکاڵی گەرمیان بە ڕۆژنیوزی وت: بەپێی داتاکانی کەشناسی بەڕێوەبەرایەتی گشتی کشتوکاڵی گەرمیان، کە وێستگەی لە زۆرینەی شوێنەکانی ناوچەکە هەیە، زۆرترین ڕێژەی باران بارین لەشارەدێی مەیدان باریوە، کە ۷٨ ملم و لەشارۆچکەی خانەقین ٤۳ ملم باریوە، ئەگەر بەراوردی بکەین بە دوو ساڵی ڕابردوو ڕێژەیەکی دڵخۆشکەرە، ساڵی ڕابردوو لە کەلار پێنج ملم باران باریبوو، ئێستا ٦۰ ملم باریوە.
هەروەها وتیشی: ئەتوانین بڵێین ئێستا لە گەرمیان پەڵەی داوە، ساڵی ڕابردوو هیچ جوتیارێکمان سوودی لەبارانی تشرین وەرنەگرتبوو، کە یەکێکە لەبارانەکان بۆ بوژانەوەی خاک لە دوای کۆتای هاتنی وەرزی هاوین.
ئەو هێشتا ناتوانێت ڕایبگەیەنێت، كە گەرمیان بۆ ئەمساڵ ڕووبەڕوی وشكە ساڵی نابێتەوە و وتی: ناتوانین بڵێین گەرمیان ڕزگاری بووە لەمەترسی وشکە ساڵی، چونکە تا مانگی چوار پێویستی بە باران بارینە، دانەوێڵە و بەرهەمە کشتوکاڵیەکانمان پێویستیان بە بارانە، بەڵام وەک سەرەتایەک بۆ باران جێگای دڵخۆشکەرە.
بەڕێوەبەری کشتوکاڵی گەرمیان، ئاماژەی بەوەشدا، بەپێی ستاندەر بۆ گەرمیان ۲٥۰ ملم باران بارین باشە و وتیشی: لە ڕێژەی ۲٥۰ملم بۆ ۳۰۰ ملم باران، دەتوانین بڵێن، گەرمیان ڕزگار دەکات لە وشکەساڵی، بەڵام ئەوە ناگەیەنێت لەماوەی مانگێکدا ئەو ۳۰۰ ملم ـبارانە ببارێت، بەڵکو دەبێت بەهاوسەنگی باران ببارێ لەسەرەتا و ناوەڕاست و کۆتایی وەرز.
لەبارەی پێشبینییەكانەوە لەسەر ڕێژەی بارانبارین ئەمساڵ لە سنوری گەرمیان بەڕێوەبەری کشتوکاڵی گەرمیان وتی: بەپێی پێشبینەکان، ئەمساڵ لە گەرمیان، تەڕە ساڵ دەبێت و ڕزگارمان دەبێت لەوشکە ساڵی.
س.س
.
