لە سلێمانی لە ٢٤ کاتژمێردا زیاتر لە هەزار دۆنم پوش و پاوان سوتا

 لەماوەی ٢٤ کاتژمێری ڕابردوودا لە سێ ڕووداوی ئاگرکەوتنەوەی جیادا لە سنوری پارێزگای سلێمانی زیاتر لە یەک هەزاردۆنم پوش و پاوان سوتا.


بەرێوەبەرایەتی پۆلیسی دارستان و ژینگەی پارێزگای  سلێمانی، ڕایگەیاند، لەماوەی ٢٤ کاتژمێری ڕابردوودا لە سێ ڕووداوی ئاگرکەوتنەوە لە سنوری و ئاغجەلەر و ماوەت و قەرەداغی سنوری پارێزگای سلێمانی زیاتر لە (١٠٠٠) هەزاردۆنم پوش و پاوان سوتاون.

عەمید هێمن کمرخان ئەفەندی، بەڕێوەبەری ڕاگەیاندن لە بەرێوەبەرایەتی پۆلیسی دارستان و ژینگەی پارێزگای  سلێمانی بە ڕۆژنیوزی ڕایگەیاند، ئاگرێکی بەرفراوان کەوتۆتەوە  لەسنوری شارەدیی گاپیڵۆنی سەر بە شارۆچکەی ماوەت، دەست بەجێ مەفرەزەکانی بنکەی  پۆلیسی دارستان و ژینگەی گاپیڵۆن گەیشتونەتە شوێنی ڕووداوەکە و هەوڵی کۆنترۆڵکردنی ئاگرەکەیانداوە، بەڵام بەهۆی سەختی ناوچەکە و بوونی مەترسی (مین) و نەبوونی کەرەستەی پێویست و تایبەت بە کوژاندنەوەی ئاگر کۆنترۆڵی ئاگرکە دژوار بووە، دوای سوتانی نزیکەی هەزار دۆنم لە پوش و پاوان ئاگرەکە کۆنترۆڵکراوە.

لەلایەکی دیکەوە ئاگرێک لەسنوری ئاغجەلەری سەر بە قەزای چەمچەماڵ، کەوتەوە و دوای هەوڵەکانی مەفرەزەکانی بنکەی  پۆلیسی دارستان و ژینگەی ئاغجەلەر، توانراوە  ئاگرەکە کۆنترۆڵ بکرێت و ئاگرەکەش زیاتر لە پەنجا دۆنم لە پوش و پاوانی  سنورەکەی سووتاندووە.

لەڕووداوێکی دیکەشدا لە شاخی سەگرمە، لەسنوری  قەرەداغ ئاگر کەوتەوە و مەفرەزەکانی بەشی پۆلیسی قەرەداغ خاڵی وەزیارە، گەیشتوونەتە شوێنی ڕووداوەکە و توانراوە لەماوەیەکی کەمدا ئاگرەکە کۆنتڕۆڵ بکرێت و تەنها دوو دۆنم لە پوش و پاوان سووتاوە.

بەڕێوەبەری ڕاگەیاندن لە بەڕێوەبەرایەتی پۆلیسی دارستان، وتیشی: هۆکاری کەوتنەوەی ئاگرەکان نادیارە و لێکۆڵینەوە لە بارەیانەوە بەردەوامە.

ک.س