لە ڕۆژی جیهانیی ژینگەدا داوای ئاگادارکردنەوەی تورکیا دەکرێت

لە ڕۆژی جیهانیی ژینگەدا داوا دەکرێت بۆردوومان و تۆپبارانەکانی دەوڵەتی تورک ڕابگیرێت و ئاگاداربکرێتەوە، کە کردەوەی سەربازیی لەسەر زەوی وڵاتێكی تر كارێكی نائاسایی و نایاساییە.


ئێوارەی ئەمڕۆ لە شارۆچكەی سۆران-ی سەر بە پارێزگای هەولێر رێكخراوی وار بۆ پاراستنی ژینگە بە ئامادەبوونی بەرپرسانی حزبی و حكومی و چالاكوان بەبۆنەی ڕۆژی جیهانی ژینگەوە، مەراسیمێكی بەڕێوەبرد بۆ ماوەی سێ خولەكیش هاتووچۆی ئۆتۆمبێل ڕاگیرا.

لە مەراسیمەكەدا، هەژار ماهیر، سەرۆكی رێكخراوی وار بۆ پاراستنی ژینگە باسی لەوە کرد، کە ساڵانە نزیكەی حەوت ملیۆن كەس بەهۆی پیسبوونی هەوا گیان لەدەست دەدەن ،كە زۆرینەیان دانیشتووی كیشوەری ئاسیا و زەریای هێمنن بۆیە پێشبینیی دەكرێت ئەم ساڵ نەتەوە یەكگرتووەكان بە توندی هانی وڵاتان بدات بۆ بەدیهێنانی وزەی پاك و وزەی سەوزی ژینگە و پاكسازیی و چاكسازیی لەپێناو هەوایەكی پاك و تەندروست بۆ دانیشتوانی زەوی بەگشتیی.

سەرۆكی رێكخراوی وار بۆ پاراستنی ژینگە، بە ئەركی حكومەتی هەرێمی كوردستان-ی بەپێویستی زانی، كە ڕێگە لە پێشێلكاریی سەر ژینگە بگرێت و كار بۆ زیادكردنی ڕێژەی سەوزایی و پاراستنی ئاژەڵ و پەلەوەر بكات و لەڕێگای ناوەندەكانی خوێندن و هەوڵی بلاوكردنەوەی هۆشیاری ژینگەیی بدرێت.

دواتر، ڕاگەیەندراوی ڕێکخراوەکە خوێندرایەوە، کە تیایدا باس لە کاریگەریی بۆردوومانەکان  وتۆپبارانەکانی دەوڵەتی تورک کرا لەسەر ژینگەی هەرێمی کوردستان و  داوای ڕاگرتنی کرا، داواشکرا لەوپێناوەدا ڕای گشتیی جیهان و حکومەتی هەرێم و بەغدا هەوڵە دبلۆماسییەكانیان یەكبخەن.

باس لەوەشکرابوو، کە پێویستە"وڵاتان توركیا لەوە ئاگاداربكەنەوە، كە لەو پرۆتۆكۆل و پەیماننامانە نێودەوڵەتییەکاندا، کردەوەی سەربازیی لەسەر زەوی وڵاتێكی تر كارێكی نائاسایی و نایاساییە".

رێكخراوی وار لە كۆتایی راگەیاندراوەكەیدا ئاماژەی بۆ كاریگەریەكانی تۆپباران و بۆردوومانی سوپای تورك كردووە بە سەر ژینگەی هەرێمی كوردستان.

لە پەراوێزی مەراسیمەكەدا ژمارەیەك كەسایەتیی و ڕاگەیاندنكارن و دەزگای حكومی خەلاتكران، كە ڕۆڵیان هەبووە لە كاركردن بۆ هۆشیاریی ژینگەیی.

 

ش.ف