"نەبوونی ئاوەڕۆی گونجاو هۆكاری لافاوەکانی هەولێرە"

ئەندازیارێكی شارستانی نەبوونی سیستمی ئاوەڕۆی پێویست و گونجاو لە هەولێر، هەروەها كەمیی ڕێژەی سەوزایی، بە هۆكاری سەرەكی دەزانێت بۆ دروستبوونی لافاو.


ساڵانە لەگەڵ بارینی باران لە وەرزی زستاندا، لە هەرێمی كوردستان بە گشتی و شاری هەولێر بە تایبەتی، لە شەقام و گەڕەكەكانی شار لافاو دروست دەبێت، تاوەكو ئێستا حكومەتی هەرێم نەیتوانیوە چارەسەر بۆ دروستبوونی لافاو بدۆزێتەوە، ئەندازیارێكی شارستانی لەوبارەیەوە بۆ ڕۆژنیوز قسەیكرد.

عەبدولرەحمان محەمەد، ئەندازیاری شارستانی، وتی:"نەبوونی سیستمی ئاوەڕۆی گونجاو لەناو شاری هەولێر، بەتایبەت لە شەقامەكانی ١٠٠ مەتری و ٦٠ مەتری، یەكێكە لە هۆكارە سەرەكییەكان بۆ دروستبوونی لافاو لە بەشێك لە گەڕەك و شەقامەكانی شارەكە، حكومەتیش لەوبارەیەوە كەمتەرخەم بووە لە دروستكردنی سیستمی ئاوەڕۆی پێویست".

ئەو ئەندازیارە ئاماژەی بەوەدا، سیستمی ئاوەڕۆی هەولێر بەشێوەیەكە، كە هەم ئاوی پیس و هەم باراناو دەچنە نێو یەك سیستمی ئاوەڕۆوە، ئەو سیستمی ئاوڕۆیەش كە هەیە، بەرگەی ئەو هەموو ئاوە ناگرێت، بۆیە لافاو دروست دەبێت.

ئەندازیارەكەی هەولێر نەبوونی ڕووبەرێكی فراوانی سەوزاییشی بەهۆكارێكی دیکەی دروستبوونی لافاو زانی، چونكە "ئەو سەوزاییە توانای هەڵمژینی باراناوی هەیە".

بەپێی زانیارەكانی ڕۆژنیوز، بڕیارە ڕێكخراوێكی بیانی كار لەسەر دروستكردنی سیستمێكی ئاوەڕۆی ئاوی پیس بكات لە شاری هەولێر، بەڵام تا ئێستا وادەیەكی دیارینەكردووە بۆ دەستبەكاربوون لە پڕۆژەكە.

س.ح