هەزاران دۆنم لە دارستانی هەورامان دەسوتێت

ماوەی دوو ڕۆژە ئاگرێک لە گوندەکانی هەورامان کەتووەتەوە و هەزاران دۆنم  لە دارستانی سروشتیی و ڕەز و باخی هاوڵاتیانی سوتاندووە.


له‌ دوانیوه‌ڕۆى دوێنێوه‌ ئاگرێک سنورى گونده‌کانى ده‌گا شێخان و سه‌یرانگاى ئاوێسه‌ر و پشتى شاخى بیاره‌ى گرتوه‌ته‌وه‌ لە انوچەی هەورامان و تا ئێستا نه‌توانراوه‌ کۆنتڕۆڵ بکرێت.

لەبارەی هۆکاری ئاگرکەوتنەوەکە، زانیار عومه‌ر، وته‌بێژى به‌ڕێوه‌به‌رایه‌تى به‌رگریى شارستانیى هه‌ڵه‌بجه‌ به‌ ڕۆژنیوزى ڕاگه‌یاند: هۆکاری ئاگرکەوتنەوەکە نەزاندراوە و بەهۆی سەختیی ناوچەکە و بەرفراوانیی ئاگرەکەشەوە تا ئێستا نەمانتوانیوە کۆنترۆڵی بکەین.

سەبارەت بە زیانەکانیش، ناوبراو، وتی: به‌هۆى ئه‌وه‌ى تیمه‌کانمان هێشتا سه‌رقاڵى کۆنتڕۆڵکردنى ئاگره‌که‌ن، دیارییکراوى زیانەکانمان دەستنیشان نەکردووە، به‌ڵام به‌ هه‌زاران دۆنم له‌ باخ و دارستانى سروشتیى و به‌شێک له‌ ڕه‌ز و باخى هاوڵاتیانیش سوتاوه‌.

بەگوێرەی ئاماری بەرگریی شارستانیی هەڵەبجە، له‌ به‌روارى ١/٧/٢٠١٨ تا ٢٥/٧/٢٠١٨ له‌ سنووری بەرێوبەرایەتییەکدا ٢٣ حاڵه‌تى جۆراوجۆرى ئاگرکه‌وتنه‌وه‌ تۆمارکراون، که‌‌ بڕى ١٢ ملیۆن و ٥٠٠ هه‌زار دینار زیانیان لێکەتووەتەوە، به‌ شێوه‌یه‌کى گشتیش له‌سه‌ره‌تاى ئه‌مساڵه‌وه‌ تا ٢٥/٧/٢٠١٨ به‌هۆى ئاگرکه‌وتنه‌وه‌وه‌ به‌ بڕى زیاتر له‌ ٨٧ ملیۆن دینار زیان به‌هاوڵاتیان گه‌یشتووه‌.

 

ش.ف