هەولێر، سەدان دۆنم دەغڵودانی جووتیاران سووتا

 پاشنیوەرۆی ئەمڕۆ ئاگر لە دەغڵودانی جووتیانی گوندی سفەیەی سنوری شارۆچكەی خەباتی سەر بە پارێزگای هەولێر كەوتەوە، بەوهۆیەوە سەدان دۆنم زەوەی زار و دەراسەیەكیش لە كاتی دروێنەكردندا سووتا.


 ئەمرۆ لە كاتی  دورێنەکردنی بەرهەمەكانیان، لە گوندی سفەیەی سەر بە شارۆچكەی خەبات، ئاگر لە دەغڵودانی جووتیاران بەربوو.

ئاگرەکە جیا لە سووتانی سەدان دۆنم، دەراسەیەکیش سووتا، بەشداری عەلی یەكێك لەو جووتیارنەی كە ئەمڕۆ زەویەكەی سووتانە، بۆ ڕۆژنیوز دوواو وتی: بەداخەوە بە هۆكارێکی نادیار ئاگر لە سەدان دۆنم زەوەی گوندەكەمان كەوتەوە، یەكێك لە زەویەكانیش هیی من بووە، بەرگری شارستانیش كەمتەرخەم بوو لە كوژاندنەوەی ئاگرەكە و نزیكەی سەعاتێك دەبوو پەیوەندمان پێوە كردبوون، بەڵام ئەوان هەر نەهاتن.

ئەو جوتیارە باسی لەوەشکرد، کە ئەوان هەموو سالێك داوایان لە بەرگری شارستانی شارۆچكەی خەبات كردووە،  كە بەردەوام تیمێك لە سنورەكەیان دابنێن لە كاتی  وەزری دروێنە، بەڵام داواكاریەكانیان بە هەند وەرنەگیراوە، وتیشی:" ئەمەش ئاكامەكەی بوو".

 گوندی سفەیە دەكەوێتە باكوری ڕۆژئاوای شاری هەولێرەوە، نزیكەی ٤٥ كم لە هەولێرەوە دوورە، تەواوی دانیشتوانەی لە پێكهاتەی كاكەین.

س.ح