هەڵمەتێکی چاندنی نەمام لەسەیدسادق دەستیپێكرد

لە سەیدسادق بەئامانجی خۆشەویستی نەوەكان بۆ چاندنی نەمام، هەڵمەتێكی فراوان بۆ چاندنی ٧ هەزار نەمام دەستیپێکرد.


هەڵمەتەكە لە لایەن ڕێكخراوی بێخود، بەهاوبەشی سەرۆكایەتی شارەوانی سەیدسادق، بەئامانجی خۆشەویستی نەوەكان بۆ چاندنی نەمام،  لەشارۆچكەکە بەڕێوەدەچێت، سەرەتای هەڵمەتەکەش ئەمڕۆ لە باخچەی ڕیشەی بێسامان لەگەڕەكی حەساری شارۆچکەی سەیدسادق، بە چاندنی ٦٠٠ نەمام و سەوزکردنی باخچەکە دەستیپێکرد.

بەشداربووانی هەڵمەتەكە دەڵێن: لە ئەمڕۆوە دەستیانكردوە بەچاندنی ٧ هەزار نەمام، هەڵمەتەكەش بەردەوامی دەبێت و زۆربەی شوێنەكان دەگرێتەوە، وەك قوتابخانە، مزگەوت و ماڵەكان.

هێمن ئەحمەد، بەرپرسی بەشی ژینگە لەڕێكخراوی بێخود، بۆ ڕۆژنیوز وتی: "وەك ڕێكخراوی بێخود ئەمڕۆ هەستاوین بەچاندن و سەوزكردنی یەكەم باخچە لەگەڕەكی حەساری شاری سەیدسادق، لەژێر ناوی "نەمامێكی زیاتر بچێنە بۆ ژینگەیەكی باشترە".  

وتیشی": ئەو باخچەی ئەمڕۆ سەوزمانكردوە ڕووبەرەكەی ٣٥٠ مەترە، نزیكەی ٦٠٠ داری جۆراو لەجۆرەكانی سەبەح بەح، دەدۆنیا، زەیتون و چەند جۆرێكی دیكەی نەماممان تێدا ناشتووە.

هەر لە بارەی هەڵمەتەکەوە ئەنور تاهیر، ئەندامی ئەنجومەنی پارێزگای سلێمانی بۆ ڕۆژنیوز وتی "لەڕێگەی پارێزگای سلێمانیەوە توانیومانە بە بڕی یەك ملیۆن دینار درەختی جۆراو جۆر بۆ ڕێكخراوەكە دابین بكەین و خۆشمان هاوكارییان بووین لەناشتنەكەیدا، داواكاریشمان لەهاوڵاتیانە هاوكارمان بن لەپاراستنی نەمامەكان بۆ ئەوەی هەموو لایەك سودی لێوەربگرێت".

ک.س