هەڵەبجە، ئەو ماڵانەی ڕێژەی سەوزایی و باخچەیان زۆرە خەڵات كران

لەژێر ناوی (جوانی ژیان و باشی تەندروستیمان پەیوەستە بە سەوزی ژینگەوە) لەباخی گشتی هەڵەبجە مەراسیمی ساڵانەی خەڵاتكردنی ئەو ماڵانە بەڕێوەچوو ڕێژەی سەوزایی و باخچە لەماڵەكانیاندا زۆرە.


ئامانجی مەراسیمەكەش زیاتر هاندان و كێبڕكێ دروستكردنە لەنێوان هاوڵاتیاندا بۆ ناشتنی درەخت و زیاد كردنی ڕووبەری سەوزایی لە ماڵەكانیاندا، ئەم ساڵ چوارەم ساڵە لەسەر یەك ئەم مەراسیمە ڕێكدەخرێت كە لەلایەن تۆڕی ڕێكخراوەكانی هەڵەبجە و بەهاوكاری لایەنە پەیوەندیدارەكانی شارەكە بەڕێوەچوو.

هاوڵاتی دەرسیم محەمەد بە ڕۆژنیوز ڕاگەیاند، زەوییەكەی ئێمە ٢٠٠ مەترە و  ١٠٠ مەتریمان كردوە بە درەخت و سەوزایی.

وتیشی: خۆشحاڵێن یەكێك لەو ماڵانە بووین لە مەراسیمەكەدا خەڵاتكراین، كاری باخچەكەش وەك ئاودێران و پاكردنەوە زیاتر دایكم دەیكات، كاری بڕین و هەڵپاچینیش ئێمە دەیكەین، ئەو درەختانەشی ناشتوومانە وەك (گوڵەباخ، درەختی واشنتن، هەرچەندە تەمەنیان كەمە و نزیكەی هەشت ساڵ دەژین، بەشێكیشیان  تەمەنیان دەگەڕێتەوە بۆ ساڵی هەشتاكان و تا ئێستا ماون. 

ئەرسەلان عابد سەرۆكی تۆڕی ڕێكخراوەكانی هەڵەبجە بە ڕۆژنیوزی وت: پرۆژەی سەوز كردن و هەڵسەنگاندنی باخچەكانی شاری هەڵەبجە پرۆژەیەكی ساڵانەی تۆڕی ڕێكخراوەكانی هەڵەبجەیە، بەمەبەستی هاندان و نرخاندنی پێزانینی بۆ ئەو ماڵانەی خاوەنی باخچەیەكی سەوزن، بەشێك لەو زەویانەی بۆ خانوو دایانناوە كردویانە بەباخچەیەك كە بۆ تەندروستی خۆیان و سەوزكردنی شارەكە ڕەنگی داوەتەوە.

وتیشی:ڕوو بە ڕووبونەوەی پیس بوونی ژینگە و زیادكردنی ڕێژەی سەوزایی ئەركی هەموو تاكێك و ڕێكخراو و دامەزراوەیەكە.

د.ح