هەڵەبجە، بەهۆی ئاگركەوتنەوە هەزاران دۆنم دارستانی سروشتی سوتاون

لە ماوەی هەشت مانگی ڕابردوودا لە سنوری پارێزگای هەڵەبجە، هەزاران دۆنم پوش و پاوان و دارستانی سروشتی سوتاون و بەراورد بەساڵی ڕابردوو ڕووداوەكانی ئاگركەوتنەوە زیادیانكردووە.


لەكۆنگرەیەكی ڕۆژنامەنوسیدا پۆلیسی دارستان و ژینگەی هەڵەبجە ئاماری هەشت مانگی ڕووداو و چالاکییەکانی سنوری بەڕێوەبەرایەتییەكەیانی ڕاگەیاند، بەپێی ئامارەكانیش ڕووداوەكانی ئاگركەوتنەوە بەراورد بەساڵی ڕابردوو زیادیانكردووە.

لە کۆنگرەکەدا فەرمان عومەر، وتەبێژی پۆلیسی دارستان و ژینگەی هەڵەبجە، ئاماری هەشت مانگی سنوری بەڕێوەبەرایەتیەكەیانی ئاشكرا كردو وتی: لەو ماوەیەدا زیاتر لە ٧٠ تۆمەتبار دەستگیركراون كە سەرپێچیانكردوە لەیاسا كارپێكراوەكان، هەروەها بە بڕیاری دادوەری لێكۆڵینەوەش، ٣٢٠ تۆڕی ڕاوكردن كە لەكاتی قەدەغەكردنی وەرزی ڕاوەماسیدا دەستی بەسەر داگیراوە ئەمڕۆ لەناو دەبرێن.

وتیشی: لەهەشت مانگی ڕابردوودا ٢٦ چەكی جۆراو جۆر دەستی بەسەرداگیراوە، كە بەشێكیان بەبێ‌ مۆڵەت هەڵگیراون بەشێكی دیكەشیان بۆ ڕاوكردن بەكارهاتووە، جگە لەوەش ٢٥ ماتۆڕسكیلو ئۆتۆمبێل دەستی بەسەرداگیراوە كە بۆ ڕاوكردنی نایاسای بەكارهاتووە.

سەبارەت بەڕووداوەكانی ئاگركەوتنەوە لەسنورەكەیاندا ئاماژەی بەوەكرد، دیاردەیەك ئەمساڵ زیاتر بەربڵاوبوە بەراورد بەساڵانی ڕابردوو بوونی ئاگركەوتنەوەیە، كەزیاتر  لە ٢٥ حاڵەتی ئاگركەوتنەوە هەبووە و بەو هۆیەوە هەزاران دۆنم پوشو پاوان و دارستانی سروشتی ناوچەكە سوتاون.

سەبارەت بەوەی كە بەشێك لەو كەسانەی بەشێوەی نایاسای ڕاوی ماسی دەكەن كارمەندی هێزە ئەمنیەكان وتەبێژەكەی پۆلیس وتی: هەركەسێك بەڵگەیەكی هەبێت ئامادەین پێشوازی لێبكەین، چ لای خۆمانەوە بێت یان لەڕێگەی دادگاكانەوە بتوانین سكاڵا لەسەر هەر ئەفسەر پۆلیسێك بجوڵێنین كەوا تۆمەتبار بێت بەهاوكاری سەرپێچیكاران و ڕاوكردنی نایاسایی، چونكە ڕاوی ماسی تەنها بەقولاپ لەگەڵ تۆڕ ڕێگە پێدراوە.

ک.س