هەڵەبجە، لە ٣١ ساڵی ڕابردوودا تەنها ٢٤ باخچە لەشارەكەدا دروستكراوە

لە 31 ساڵی ڕابردوودا لە شاری هەڵەبجە تەنها 24 باخچە دروستكراوە، چالاكوانێكی بواری ژینگەش دەڵێت: لە هەڵەبجەدا پاركێكی ستاندەر نییە و ئەو باخچانەش كە هەیە بەشێوەی یەكسان دابەش نەكراون، ڕێژەی سەوزایی شارەكەش بەپێی ستانداری جیهانی نییە و 11% یە. سەرۆكی شارەوانیش ئاشكرایدەكات "بەهۆی نەبوونی كارمەندەوە دروستكردنی باخچەمان وەستاندوە".


زۆربەی شار و ناوچەكانی هەرێمی كوردستان، بەراورد بە ڕێژەی ستانداردی جیهانی گرفتی كەمی سەوزاییان هەیە، بەوتەی بەرپرسانی شارەوانی هەڵەبجە و چالاكوانانی بواری ژینگەش هەڵەبجە گرفتی كەمی سەوزایی هەیە.

لەسەر ئەو پرسە مەنزەر عەلی، لێپرسراوی كۆمەڵەی كوردستانێكی سەوز لەپارێزگای هەڵەبجە بۆ ڕۆژنیوز، وتی: دوای ئەوەی هەڵەبجە كیمیابارانكرا، ژینگە زەرەرمەندی یەكەم بوو، بەپێی ئامارەكانیش لە ئێستادا ڕێژەیی سەوزای لەهەڵەبجەدا 11% یە، ئەو ڕێژەیەش ستانداردی جیهانی نیە و پێویستی بەزیادكردنی ڕێژەكە هەیە، لەپاڵ ئەوەشدا پێویستی بەهەوڵی ڕێكخراوەكان و زیادكردنی بودجەی شارەوانییە.

ئەو چالاكوانەی بواری ژینگە ڕاشیگەیاند، "وەك ڕێكخراوە ژینگەییەكان بەرنامەیەكمان هەیە، هەر نەمامێك بزانین سەوز نابێت ناینێژین، هەوڵیشدەدەین لەگەڵ شارەوانی هەڵەبجە بەپێی بەرنامە ئەو نەمامانەی دەچێنرێن پەروەردە بكرێن بۆ ئەوەی سەوز بێت".

لێپرسراوی كۆمەڵەی كوردستانێكی سەوز، ڕاشیگەیاند، "ئەگەر ڕێژەیی سەوزایی دابەشبكەین بەسەر گەڕەكەكانی هەڵەبجەدا، ناتوانین بڵێین پاركێكی ستاندارد هەیە، ڕێژەیی سەوزاییش بەشێوەیی یەكسان دابەش نەبووە بەسەر شارەكەدا، چونكە زۆرێك لەگەڕەكەكان بێبەشبوون لەدروستكردنی پارك، ئەوەش یەكێكە لەگرفتەكان زۆر شوێنیش هەیە لەنەخشەی شارەوانی دانراوە بۆ پارك، بەڵام لەلایەن هاوڵاتیانەوە زیادەڕەویی كراوەتە سەر زەوییەكان و كراوە بەخانوو.

كوێستان ئەكرەم، سەرۆكی شارەوانی هەڵەبجە، لەو بارەیەوە قسەی بۆ ڕۆژنیوز كرد و وتی "ئەركی ئێمەیە ژینگە بپارێزین، چ وەك لابردنی خۆڵ و خاشاك یان بەزیادكردنی ڕێژەیی سەوزایی"، وتیشی: بەداخەوە بەشێك لەهاوڵاتیان بەرپرسیارنین لەبەرامبەر پاراستنی ژینگە و بەهۆی بەرەڵاكردنی ئاژەڵەكانیان بۆ شوێنە گشتییەكان زیان بە ژینگە دەگەیەنن، هەروەها لەشوێنە گەشتیارییەكانیشدا هاوڵاتیان زۆر هاوكارمان نین لەپاكڕاگرتنی شوێنە گەشتیارییەكان، كاتێك دەچنە دەرەوە بۆ گەشت و سەیران.

سەرۆكی شارەوانی داواش لە هاوڵاتیان دەكات، لە كاتی چوونە گەشت پاشماوە بەجێنەهێلن و شوێنەكانیان پاكبكەنەوە و ڕایگەیاند، جێگەی داخە لە 60%ی هاوڵاتیان ژینگە ناپارێزێن و پاك ڕای ناگرن، ئەوەش ئەركێكی قورسە بۆ ئێمە، دەبێت بەردەوام هەڵمەتی پاكردنەوە بۆ ئەو شوێنانە ئەنجامبدەین.

سەبارەت بە كەمی ڕێژەیی سەوزایی لە شارەكەشدا وتی: "ڕێژەی سەوزایی نزیكەی 12%یە  لەهەڵەبجەدا، لەبەر ئەوە پێویستمان بەسەوزایی زیاتر هەیە و هەربۆیە  ئەو ماڵانەی زیادەڕەوییانكردوە بۆسەر شۆستەكان و باخچەی بچوكیان لەبەردەم ماڵەكانیان دروستكردوە، وازمان لێهێناون".

سەرۆكی شارەوانی زیاتر باسی لەو گرفتانەش كرد كە ڕووبەڕوویان دەبێتەوە لەزیادكردنی ڕێژەی سەوزایی و وتی "بەهۆی نەبوونی كارمەندەوە دروستكردنی باخچەمان وەستاندوە، چونكە لەبەر نەبوونی كارمەند ناتوانین وەك پێویست ئەو باخچانەی هەمانە خزمەتیان بكەین، بەشێكی زۆری فەرمانبەرەكانمان خانەنشین بووە كەسیان نەخستۆتە شوێنیان بۆمان،لەپێش كیمیابارانكردنی ساڵی 1988 یش، 8 باخچەمان هەبوو ئێستا 32 باخچەمان لەناو شاری هەڵەبجە هەیە".

ك.س