٥٠٠ دار و ١٥ دۆنم زه‌وی سووتان

له‌ شارۆچكه‌ی كه‌لار، به‌ هۆكارێكی نادیار ئاگر له‌ پرۆژه‌یه‌كی دارستانی ده‌ستكرد كه‌وته‌وه‌ و ٥٠٠ دار سووتا.


دوا نیوه‌ڕۆی ئه‌مڕۆ، پرۆژه‌ی دارستانی ده‌ستكردی هه‌ژار، له‌ شارۆچكه‌ی كه‌لاری ناوه‌ندی ئیداره‌ی گه‌رمیان، كه‌ ساڵی 2012 دروستكراوه‌ و ده‌كه‌وێته‌  به‌رزاییه‌كانی به‌رده‌ سوور لەنزیك زانكۆی گه‌رمیان، سووتا.

به‌ پێی ئه‌و زانیارییانه‌ی، هونه‌ر مه‌حمود، به‌ڕێوه‌به‌ری دارستان و پاوانی گه‌رمیان، به‌ ڕۆژنیوزی داوه‌، به‌ هۆی ئه‌و ئاگره‌وە 15 دۆنم زه‌وی  و ٥٠٠ دار و سیسته‌می ئاودانی پرۆژه‌كه‌، كه‌ تاكه‌ سیسته‌مه‌، له‌هه‌رێمی كوردستان هه‌یه‌ به‌ شێوه‌ی دڵۆپه‌ ئاوی دارده‌دات، به‌ته‌واویی و سووتاون‌.

به‌ڕێوه‌به‌ری دارستان و پاوانی گه‌رمیان‌، وتیشی: تیمه‌كانی به‌رگریی شارستانی كه‌لار، له‌ ماوه‌ی زیاتر له‌ كاتژمێرێكدا توانیویانه‌ ئاگره‌كه‌ كۆنترۆڵبكه‌ن و تا ئێستاش هۆكاری كه‌وتنه‌وه‌ی ئاگره‌كه‌ نه‌زانراوه‌.

پرۆژه‌ی دارستانی ده‌ستكردی هه‌ژار، ڕووبه‌ڕه‌كه‌ی ٣٠٠ دۆنم زه‌وی ـ ه‌ و ٤٠ هه‌زار داری تێدایه‌.

ش.ف