ئەمڕۆ، هێمن کەمرخان ئەفندی،  بەڕێوەبەری ڕاگەیاندنی بەڕێوەبەرایەتی پۆلیسی دارستان و ژینگەی پارێزگای سلێمانی لە ڕاگەیەندراوێکدا دەستگیرکردنی سێ سەرپیچیکاری ڕاگەیاند، کە لە شاخی قولە ڕەش لە سنووری شارۆچکەی چەمچەماڵ-ی پارێزگای سلێمانی سەرقاڵی ڕاوکردنی باڵندەی کێوییی بوون.

بەپێی ڕاگەیەندراوەکە، دەستگیرکردنی ئەو سێ سەرپێچیکارە، لەچوارچێوەی مەفرەزەیەکی بنکەی پۆلیسی دارستان و ژینگەی تەکیە سەر بە بەشی پۆلیسی دارستان و ژینگەی چەمچەماڵ بووە.

باس لەوەش کراوە، کە هاوکات دەستگیراوە بەسەر چەکێکی جۆری تاپڕ و دوو  فیشەکی تاپڕ و لایتێکی دەستیی، کە بۆ ڕاوکردن بەکاریان هێنابوو، لەگەڵ یەک باڵندەی زیندوو لەجۆری سوێسکە و  باڵندەیەکی ڕاوکراودا.

هەروەها، ئەوەش هاتووە:  پاشان سەرپێچیکاران وکەرەستە دەست بەسەراگیراوەکان ڕادەستی دادگا کران بەمەبەستی لێپێچینەوەی یاسایی .

لەکۆتایی ڕاگەیەندراوەکەدا، جەختی لەوە کراوەتەوە، کە لەپێناو پاراستنی سروشت و ژینگەی کوردستان دا پێویستە هەموان  پابەندبین بەڕێنمایە کانی پۆلیسی دارستان.                                               

ش.ف