ڕژاک: لەگەڵ سەردانەکەی سەرۆک کۆماردا هێرشی خواکورک دەستیپێکرد

لە بەیاننامەیەکدا ڕژاک ئاماژە بە مەترسییەکانی هێرشی سوپای تورک بۆ باشوری کوردستان دەکات، هەروەها بێدەنگی حکومەتی ناوەند و هەرێم و حزبەکان بەقبوڵکردنی هێرشەکان دەزانێت و ڕاشیدەگەیەنێت، لەگەڵ سەردانەکەی د. بەرهەم سەرۆک کۆماری عێراقدا هێرشی خواکورک دەستیپێکرد.


دەربارەی هێرشەکانی دەوڵەتی تورک بۆ باشوری کوردستان و دەسپێکردنی ئۆپەراسیۆنی نوێ، ڕێکخراوی ژنانی ئازادی کوردستان- ڕژاک، ڕاگەیەندراوێکی بڵاوکردەوە و داوای هەڵوێست لە هەموو لایەک دەکات.

لە بەیاننامەکەی ڕژاک-دا هاتووە:"هەموو هێرشەکانی سەر باشوری کوردستان شەرمەزار دەکەین، ئێمەی ژنان خۆمان بەرپرسیار دەبینین لە بەرامبەر هەر هێرش و پەلامارێک کە دەکرێتە سەر ئەم هەرێمە، وەک هەمیشە پیلانێکی فرە لایەن هەیە دژی شۆڕشی ڕزگاری کورد، ئەو گۆڕانکاریانەی لە ڕۆژهەڵاتی ناوەڕاست و جیهان ڕوودەدەن ڕاستەوخۆ کاریگەری گرنگی لەسەر کوردستان هەیە، ڕۆڵی کوردیش گرنگ و کاریگەرە، چونکە بەبێ کورد هیچ جۆرە چارەسەریەک ئەنجام گیرنابێت، ئەمڕۆ کورد خاوەنی هێزی سیاسی و سەربازیشە، بەدەر لەو کوردانەی حوکمڕانیەکی شەرمنانە و تەسلیمکارانە بەڕێوە دەبەن".

هەروەها هاتووە: ئەو داگیرکاریانەی لەسەر باشوری کوردستان بە ڕێوەدەبرێن لەم کاتەدا فرە لایەنە و دەوڵەتی عێراق و حکومەتی باشوری کوردستانیش پەیوەندیدار دەکات، چونکە بەو سەردانەی وەزیری دەرەوەی عێراق و سەرۆک کۆماری عێراق بۆ لای ئەردۆغان، لە هەمانکاتدا ئۆپەراسیۆنی سەر خواکورک دەستیپێکرد، ئەو هێرشە هێرشێکە بۆ سەر هەموو کوردستان و عێراقیش، هەتا بۆ سەر جیهانیش مەترسیدارە چونکە بەرهەمهێنەری داعش و پاکتاوکردنی گەلی کوردە".

لە بەیاننامەکەدا ڕژاک ئاماژەی بەوە کردووە، کە ئاکەپە تەنها دوژمنی باکووری کوردستان نییە و دوژمنی هەموو کوردە، ڕاشیگەیاندووە: لێرەدا بێدەنگی عێراق و هەرێم و هەموو حیزبەکان، واتە قبووڵکردنی ئەو هێرشانەی کە دەکرێتە سەر خاکی هەرێمی کوردستان، بە بیانووی هەبوونی گەریلا، تەقینەوەکانی کەرکوک و سووتاندنی دەغل و دانی هاوڵاتیان، هاوکاتە لەگەڵ ئۆپەراسیۆنەکەی خواکورک.

ڕژاک بانگەوازیی دەکات "بانگ لە هێزی نێونەتوەیی و دەوڵەتانی دیکە دەکەین، داوا لە هەموو حیزبە سیاسیەکانی باشوری کوردستان و ژنان و گەنجان دەکەین، هەڵوێستیان هەبێت لە بەرامبەر هەموو ئەو هێرشانەی سوپای تورکی داگیرکەر بۆ سەر باشووری کوردستان ئەنجامی دەدات، پێویستە ژنان ڕۆڵی ئاشتی و چارەسەری بگێڕن لەم دۆخەدا، و پێویستە بە ئەرکی خۆمان هەستین و ژنان بەرژەوەندیەکانیان بخەنە لاوە چونکە ئەتوانن کاریگەریان هەبێت".

س.ح