ژمارەیەك ئەندامی كۆمەڵەی ئێران دەستیان لەكاركێشایەوە

8 ئەندام و كادری كۆمەڵەی شۆڕشگێڕی زەحمەتكێشانی كوردستانی ئێران دەستیان لەكار كێشایەوە و ڕایانگەیاند، نەبوونی ویستی چاكسازی لەناو كۆمەڵەدا، ئەوانی ناچاركردووە بەدەست لەكاركێشانەوە.


ئەمڕۆ لە ڕاگەیەنراوێكدا 8 ئەندامی كۆمەڵەی شۆڕشگێڕی زەحمەتكێشانی كوردستانی ئێران دەستیان لەكار كێشایەوە و ڕایانگەیاند، پەیوەندییەكانی كۆمەڵە، لەگەڵا ئۆپۆزیسیۆنی ئێرانی، زیاتر لەوەی پەیوەندییەكی ڕێكخراوەیی بێت، شەخسی و تاكە كەسییە، یەكێك لەو ئەندامە دەست لەكاركێشاوانە بەڕۆژنیوزی ڕاگەیاند، وازمان لەكۆمەڵە هێناوە، وازمان لەچالاكی سیاسی و ڕووناكبیری نەهێناوە.


لەبەشێكی ڕاگەیانراوەكەی ئەو 8 ئەندامەدا هاتووە:"بەشێكی زۆر لەچالاكییەكان تەنها لەلایەن سكرتێری كۆمەڵەوە دەكرێت و سازانی ژێربەژێری چارەنووسسازی وەك پاشەكشێ‌ لەفیدرالیزم دەدرێت بێ‌ ئەوەی ئەندامانی كۆمیتەی ناوەندی ئاگاداربن، پەیوەندییەكانی كۆمەڵە لەگەڵا ئۆپۆزیسیۆنی ئێرانی قەتیس كراوە بە سازكردنی چاوپێكەوتن بۆ سكرتێر لەگەڵا هەركەس كە خۆی بەنەیاری ڕژێم دەزانێ، ئیتر گرنگ نییە ئەو كەسە كێیە و چۆن بیردەكاتەوە و چ پێشینە و پێگە و ڕێكخراوەیەكی هەیە.


لای خۆیەوە جەلیل ئازادیخواز-بەرپرسی پێشووی پەیوەندییە ئێرانی و كوردستانییەكانی كۆمەڵە لە ئەمریكا، هەواڵەكەی بۆ ڕۆژنیوز پشتڕاست كردەوە و وتی:"ئێمە بەدور و درێژی لەبەیاننامەكەماندا هۆكارەكانی وازهێنانمان بڵاوكردەوە، ماوەی نزیكەی دوو ساڵە ئێمە تێبینی و ڕەخنەمان هەبووە لەسەر كۆمەڵەو پێشتر لە 14 لاپەڕەدا كۆی ئەو سەرەنجانەی خۆمان بۆ چاكسازی كۆمەڵە بەیانكردبوو، بەڵام دۆخی هەستیاری ناوچەكە و دۆخی حزب پاڵنەربوون بۆ ئەوەی ئێمە بمێنینەوە و دان بەخۆماندا بگرین بەڵام ئەمڕۆ گەشتینە ئەو بڕوایەی كەناتوانین ئیتر دان بەخۆماندابگرین".


جەلیل ئازادیخواز ئاشكراشیكرد، ئەوان وازیان لە كۆمەڵە هێناوە نەك لەسیاسەت، وتیشی:"ئێمە بەرنامەمان هەیە دەست لەكاری سیاسی و ڕووناكبیری خۆمان هەڵناگرین، ڕەنگە كارەكانی ئێمە لەداهاتوودا بەرەو دروستكردنی ناوەندێك بچێت بەڵام مەرج نیە ئەو ناوەندە ناوەندێكی سیاسی بێت".


ناوی ئەندامە دەست لەكاركێشاەوەكان:


ئەنوەر محەمەدی-ئەندامی پێشووی دەفتەری سیاسی


فاروق وەكیلی-ئەندامی پێشووی كۆمیتەی ناوەندی


سالار پاشایی-ئەندامی پێشووی كۆمیتەی ناوەندی


سۆران پاڵانی-ئەندامی پێشووی جێگری كۆمیتەی ناوەندی


جەلیل ئازادیخوا-بەرپرسی پێشووی پەیوەندییە ئێرانی و كوردستانییەكانی كۆمەڵە لە ئەمریكا


ئەنوەر ئەسەد زادە-نووسەر و سەرنووسەری پێشووی ئاسۆی ڕۆژهەڵات


بێهروز ئەمین پور-بەرپرسی پێشووی دەفتەری سكرتێر


ئەمین سورخابی-لێكۆڵەری سیاسی و كادری پێشووی ڕاگەیاندن


د.ح