ژینگە پارێزانی باڵەكایەتی بەردەوامن لە هەڵمەتی پاككردنەوەی گوندەكان

لەدرێژەی هەڵمەتی پاككردنەوەی باڵەكایەتی لە زبڵ و پاشماوە پلاستیكیەكان، سەر لە ئێوارەی ئەمڕۆ ژمارەیەكی زۆر لە گەنجان و ژنان و توێژە جیاجیاكان هەڵمەتی پاككردنەوەی گوندی وەرتێیان ئەنجامدا.


سەر لە ئێوارەی ئەمڕۆ ژمارەیەك لە ژینگە پارێزانی باڵەكایەتی هاوشان لەگەڵ بەشێك لە گەنجانی وەرتێ هەستان بە پاككردنەوەی گوندی وەردێ لەو هەڵمەتەشدا زیاتر لە 200 عەلاگەی زبڵ و پاشماوەیان كۆكردەوە و بڕیاریشە هەڵمەتەكە بەردەوام بێـت.

پێشەوا فەقێ یەكێك لە ئەندامانی دەستەی پارێزەرانی ژینگەی باڵەكایەتی بۆ ڕۆژنیوز وتی: لەدرێژەی ئەو هەڵمەتە ژینگە پارێزیەی دەستمان پێكردووە لە وەرزی بەهارەوە بۆ پاككردنەوەی شوێنە گشتیەكان و گوندە كانی باڵەكایەتی، ئەمڕۆ هەستاین بە پاككردنەوەی گوندی وەرتێ لە زبڵ و پاشماوە پلاستیكیەكان و زیاتر لە 200 عەلاگە زبڵ و پاشماوەی پلاستیكمان كۆكردەوە.

وتیشی: وەرتێ گوندێكی جوانی هەیە و ناوچەیەكی گەشتیاریی گرنگە بەڵام لە هەڵمەتی ئەمڕۆدا كە ئەم هەموو زبڵ و پاشماوە پلاستیكیەمان كۆكردەوە نیشانەی ئەوەیە كە كوردستان و ژینگە بەگشتی لەژێر مەترسیەكی گەورەدایە، هەر بۆیە ئێمە باوەڕمان وایە كە سیمینار و هۆشیاری تیۆری كاریگەریەكی وای نیە تاكو بە مەیدانی ژینگە پارێزان دەست بە چاڵاكی ژینگەیی نەكەن.

د.ح