ژینگە پارێزان سەیرانگاكانی هەولێر خاوێن دەكەنەوە

ڕێکخراوێکی ژینگه‌ پارێزی شاری هه‌ولێرهه‌ڵمه‌تی خاوێنکردنەوەی ناوچه‌ گه‌شتیارییه‌کانی هه‌ولێریان ده‌ستیپێکرد.‌


بەمەبەستی خاوێنکردنەوەی ناوچە گەشتیارییەكانی دەوروبەری شاری هەولێر، ئەمڕۆ ڕێكخراوی ژینگه‌ پارێزی شاوێری هەڵمەتێكی دەستپێكرد.

 ئەو هەڵمەتە، ناوچە گەشتیارییه‌کانی دڵۆپە و دارستانی كەسنەزانی گرتەوە، كە دەكەوێتە ١٠ كیلۆمەتر لە ڕۆژهەڵاتی شاری هەولێرەوە،  جگە لە ڕێکخراوی شاوێری، سەرۆكایەتی شارەوانی هەولێر و فەرمانگەی پاراستن و چاككردنی ژینگە و به‌شێک له‌ کاندیدانی قه‌واره‌ سیاسییه‌کان تێیدا بەشداربوون.

پێش ده‌ست پێکردنی هه‌ڵمه‌ته‌که‌ بەكر كاكۆ، لە ڕێكخراوی شاوێری ژینگەیی كە سەرپەرشتیی هەڵمەتەكە دەكات، باسی له‌ ئامانجی هه‌ڵمه‌ته‌که‌ کرد و وتی: بەهۆی ئەوەی كە ئەو ناوچانە زۆربەی خەڵكی شارەكان ڕووی تێدەكەن و زۆریش پیس دەبن، هەوڵماندا لەم هەڵمەتەدا خاوێنی بکەینەوە.

به‌کر کاکۆ، داوایکرد ئه‌و کاندیدانه‌ی که‌ به‌شدارن له‌ هه‌ڵمه‌ته‌که‌، لە پەرلەمانی هەرێمی كوردستان بەرگریی لە ژینگە بكەن و لە هەر بڕگە و بابەت و پرۆژە یاسایەكدا شوێنێك بۆ ژینگەی كوردستان بكەنەوە.

لەیلا مستەفا سەرپەرشتیاری هۆشیاری لە فەرمانگەی ژینگەی هەولێر باسی لەوەكرد، كە دەبێ پاراستنی ژینگە ببێتە وانە و ڕەوشت و ئایین و هەمووان ڕێز لە ژینگە بگرین، تا بتوانین كوردستانێكی پاك و خاوێنمان هەبێت، چونكە لە ئێستادا بەهۆی ڕەچاونەكردنی پاك و خاوێنی شوێنە گەشتیارییەكان بوونەتە زبڵخانە.

ڕێکخراویی شاوێری ده‌ستیان کرد به‌ هه‌ڵمه‌تی پاککردنه‌وه‌ی ناوچه ‌گه‌شتییارییه‌کان به‌ هاوکاریی سه‌رجه‌م به‌شداربووان، که‌ هه‌ردوو ناوچه‌ گه‌شتیاریی دڵۆپه‌ و دارستانی که‌سنه‌زانیان پاککرده‌وه‌.

ش.ف