گەرمیان، هەڵمەتێكی نەمام چاندن و پاككردنەوەی سەیرانگاكان بەڕێوەچوو

لەسنوری ئیدارەی گەرمیان هەڵمەتێكی چاندنی نەمام و پاككردنەوەی سەیرانگاكان ئەنجامدارا و لە دەربەندیخانیش فەرمانبەرانی شارۆچكەكە لەسەر ئەركی خۆیان ژمارەیەك نەمامیان ناشت.


ئەمڕۆ، بەبۆنەی هاتنی جەژنی نەورۆز و وەك ئامادەكارییەك بۆ پێشوازیكردن لە گەشتیاران، بەڕێوەبەرایەتی گەشتوگوزاری گەرمیان هەڵمەتێكی پاككردنەوەی سەیرانگاكانی لە سنوری ئیدارەی گەرمیان ئەنجامدا .

سەرەتای هەڵمەتەكەی گەشتوگوزاری گەرمیان، بە چاندنی ژمارەیەك نەمام لە دەروازەی مەرزی نێودەوڵەتی پەروێزخان دەستی پێكرد و دواتر بەرزاییەكانی نزیك گوندی بەردە سوور و سەیرانگاكانی بەرلووت و قولەبەرز و قۆرەتوو، لە خۆڵ و خاشاك و پاشماوەی  خواردن و خواردنەوەكان پاككرانەوە .

هاوكات لە شارۆچكەی دەربەندیخانی سەر بە پارێزگای سلێمانی، فەرمانبەرانی بەڕێوەبەرایەتی كشتوكاڵی دەربەندیخان، هەڵمەتێكی ناشتنی نەمامیان ئەنجامدا، لە هەڵمەتەكەدا زیاتر لە سی نەمامی بەردار نێژران، كە بریتیبوون لە زەیتوون و لیمۆ و خورما و نەمامەكانیش لەسەر ئەركی فەرمانبەران كڕدرابوون.

ك.س