گەرمیان، وۆرکشۆپێک له‌سه‌ر پیسبوونی ژینگه‌ به‌ڕێوەچوو

سه‌رۆکایه‌تی زانکۆی گه‌رمیان به‌ هاوکاری کۆمه‌ڵه‌ی ڕوناکبیری و کۆمه‌ڵایه‌تی که‌رکوک، وۆرکشۆپێکی له‌سه‌ر پیسبوونی ژینگه‌ و کاریگه‌رییه‌ نه‌رێنییه‌کانی  سازدا. 


ئه‌مڕۆ له ‌هۆڵی سیمیناره‌کانی کۆلێژی په‌روه‌رده‌ی زانکۆی گه‌رمیان، به‌ ئماده‌بوونی مامۆستایانی زانکۆ و شاره‌زاییانی بواری ژینگه‌ و به‌شێک له‌ چالاکوانانی ئه‌و بواره‌، ورکشۆپێک به‌ڕێوه‌چوو. 

له ‌وۆرکشۆپه‌که‌دا چوار وانه‌ وترانه‌وه‌، وانەکانیش لەسەر سیسته‌می ژینگه‌ و سه‌رچاوه‌کانی پیسبوونی ڕووباری سیروان و ڕه‌گه‌زه‌ پیسکه‌ره‌کانی هه‌وا و کاریگه‌رییه‌ ته‌ندروستییه‌کانی پیسبوونی ژینگه‌.

له‌ سه‌ره‌تای وۆرکشۆپه‌که‌دا، شێخ محه‌مه‌د شاکه‌لی، له‌سه‌ر ناوی کۆمه‌ڵه‌ی ڕووناکبیری و کۆمه‌ڵایه‌تی که‌رکوک، وته‌یه‌کی پێشکه‌شکرد و باسی له‌ ژینگه‌ی گه‌رمیان و کوردستان به ‌گشتی کرد، که ‌چه‌ند پێویسته‌ هه‌مووان پێکه‌وه‌ بۆ پاکڕاگرتنی هه‌وڵبده‌ین و ئامانجی ورکشۆپه‌که‌ی خسته‌ڕوو.

دواتر، پرۆفیسۆری یاریده‌ده‌ر سیروان حه‌سه‌ن، سه‌رۆکی زانکۆی گه‌رمیان، له‌ بابه‌ته‌که‌یدا، باسی له‌وه‌ کرد: که‌ ژماره‌یه‌ک شوێن هه‌ن  هۆکاری سه‌ره‌کی پیسبوونی ژینگه‌ی ناوچه‌که‌ن، که‌ پێویسته‌ فه‌رمانگه‌ی ژینگه‌ی گه‌رمیان و ڕێکخراوه‌ ژینگه‌ییه‌کانی ناوچه‌که‌ کاری بۆ بکه‌ن بۆ ئه‌وه‌ی هه‌وڵبدرێت سیسته‌مێک هه‌بێت بۆ که‌مکردنه‌وه‌ و له‌ناوبردنی ئه‌و جێگایانه‌ی که‌ بوونه‌ته‌ هۆی پیسبونی ناوچه‌که‌، بۆ نمونە شوێنی فڕێدانی پاشاڕۆی ماڵانی شارۆچکه‌ی که‌لار و شاره‌دێی ڕزگاری.

پاشان، عه‌بدولموته‌لیبب ڕه‌فعه‌ت، مامۆستا له‌ به‌شی کیمیای زانکۆی گه‌رمیان، له ‌ناوه‌ڕۆکی بابه‌ته‌که‌یدا، قسه‌ی له‌سه‌ر ئه‌وه‌ کرد، کە ڕووباری سیروان یه‌کێکه‌ له‌ ڕووباره‌ ناودار و گرنگه‌کان له‌ عێراق، چونکه‌ به‌شێکه‌ له ‌ڕووباری دیجله‌.

ئاماژه‌ی به‌وه‌شدا، ڕووباری سیروان به‌هۆی ئه‌وه‌ی پشتگوێ خراوه‌ له‌ لایه‌ن حکومه‌تی هه‌رێمی کوردستان و لایه‌نی په‌یوه‌ندیداره‌وه‌، خه‌ریکه‌ ده‌بێته‌ ڕووبارێکی ژه‌هراوی و هیچ کارێک نه‌کراوه‌ بۆ ئه‌وه‌ی ڕێگیری بکات له‌ هۆیه‌کانی پیسبوونی ڕووباره‌که‌. 


ک.ک