گەشتوگوزاری گەرمیان هەڵمەتێکی پاککردنەوە و نەمام چاندنی ڕاگەیاند

لە پێشوازی هاتنی جەژنی نەورۆزدا، بەڕێوەبەرایەتیی گشتی گەشتوگوزاری گەرمیان، هەڵمەتێکیان بەناوی هەفتەی پاککردنەوەی شوێنە گەشتیارییەکان و نەمام چاندنی ڕاگەیاند.


سەبارەت بە ڕاگەیاندنی چەند پرۆژەیەكی گەشتیاریی لە سنوری ئیدارەی گەرمیان، لەگەڵ هەڵمەتێكی نەمام چاندن و پاك كردنەوەی ناوچە گەشتیارییەكانی سنورەكە، ئەمڕۆ بەڕێوبەرایەتیی گشتی گەشتوگوزاری گەرمیان، لە شارۆچکەی کەلاری ناوەندی ئیدارەی گەرمیان، لەناو بینای بەڕێوبەرایەتییەکەیاندا،  كۆنگرەیەكی ڕۆژنامەنووسیان ئەنجامدا.

پشتیوان عەبدولکەریم بەڕێوەبەری گشتی گەشتوگوزاری گەرمیان لە کۆنگرە ڕۆژنامەنووسییەکەدا ڕایگەیاند: بەهۆی نزیکبوونەوەی جەژنی نەورۆزەوە، بۆ پێشوازی کردن لەو جەژنە ئێمە هەفتەی  پاککردنەوە لە سنووری ئیدارەی گەرمیان ڕادەگەیەنین، بۆ ئەو شوێنە گەشتیارییانەی ناوچەکە کە گەشتیاران ڕووی تێدەکەن، ئێمە وەک گەشتوگوزار تیمێک پێکدەهێنین، بەهاوکاری لەگەڵ ئەو کۆمپانیا پاککەرەوانەی لە سنوورەکەدا هەن، سەرەتای هەڵمەتەکەشمان بە چاندنی دار دەستپێدەکات لە سنووری مەرزی نێودەوڵەتی پەروێزخان.

س.ح