لە بەرامبەر بانگهێشتکردنی هونەرمەندیکی تورکی فاشیست بۆ دهۆک، جاسمی ساز ڕەخنە لە بەرپرسانی هەرێم دەگرێت و دەشڵێت: دەوڵەتی تورک هێرشدەکاتە سەر هونەر، کلتور، ئەدەب و ڕۆشبیریی گەلەکەمان.
شەوی ٧ی ئەم مانگە، لە زانکۆی ئەمریکیی دهۆک، کە مەسرور بارزانی سەرۆکی حکومەتی هەرێم خاوەنداریی دەکات، بە ئامادەبوونی مەسرور و نێچیرڤان بارزانی سەرۆکی هەرێم، ئاهەنگی دەرچوونی خوێندکاران بەڕێوەچوو، بۆ ئاهەنگەکە گۆرانیبێژێکی تورکی فاشیست بەناوی مستەفا جەجەلی، بانگهێشت کرابوو.
لەوبارەیەوە هونەرمەند جاسمی ساز بە ڕۆژنیوزی وت: تورکیا چەندین ساڵە هێرشی ناڕەوا دەکاتە سەر گەلی کورد، بە تایبەت قەندیل و ڕۆژئاوای کوردستان و لە هەمانکاتیشدا هێرش دەکاتە سەر هونەر، کلتور، ئەدەب و ڕۆشبیریی گەلەکەمان ئەوەش لەڕێگەى پەخشکردنى دراما و فیلمەکانیان لە شارى هەولێرەوە، لەکاتێکدا کارەکتەرەکانى ئەو دراما و فیلمانە بە مەبەستی سوکایەتییکردن ناوی کوردى بەکاردەهێنن و سوکایەتییش بە کورد دەکەن .
جاسمى ساز ڕاشیگەیاند: ئەگەر هونەرمەندێکی کورد لە تورکیا گۆرانییەک بە کوردی بڵێت، ئەوا بە هەزاران کەس پەلاماری دەدەن و حکومەتیش دەستگیرى دەکات، بەڵام بەرپرسانى ئێمە پێشوازیی لە هونەرمەندە تورکەکان دەکەن.
ئەو هونەرمەندە ئاماژەى بەوەشکرد: بەرپرسانى کورد لە ساڵانی ڕابردوودا ئیبراهیم تاتڵیساسیان هێنا و شوقەیان بەناو کرد و بە باشووردا پیاسەیان پێدەکرد، هاوشێوەى ئەوەش لەم ڕۆژانەدا هونەرمەندێکى دیکەیان هێنایە ناو زانکۆ و دەیانەوێت لەو ڕێگایەوە گەلی کورد بسڕنەوە.
باس لەوەکرا لەبەرامبەر بەشدارییکردنی لە ئاهەنگەکەدا، جەجەلی بڕی ١٢٠ هەزار دۆلاری وەرگرتووە، بۆ وەرگرتنی وەڵامی دروست ڕۆژنیوز سێ ڕۆژە ئەو پرسایرەی ئاڕاستەی زانکۆی ئەمریکیی کردووە لە دهۆک، بەڵام وەڵامی پرسیارەکەی نەدراوەتەوە.
ئ.م
