ژمارەیەک لە ڕۆشنبیران و چالاکوانانی هەورامان دیدارێکیان بۆ خوێندن بە شێوەزاری هەورامیی و پاراستنی کەلتوور و ژینگەی هەورامان ڕێکخست و تێیدا جەخت کرایەوە، کە پێویستە خوێندن لە سنووری هەورامان بە شێوەزاری هەورامی بێت و لە شوێنە گەشتیارییەکانیشدا گرنگیی بە شێوەزارەکە بدرێت.
ئێوارەی ئەمڕۆ لە هۆڵی دکتۆر مستە فازەڵمی لە شاری هەڵەبجە دیداری ‘خوێندن بە زمانی دایک و پاراستنی کەلتوور و ژینگەی هەورامان’ بە ئامادەبوونی ژمارەیەک لە ڕۆشنبیران و نووسەران و چالاکوانانی هەورامان بەڕێوەچوو.
لە دیدارەکەدا، جەمال بێدار، نووسەر و پسپۆڕی شێوەزاری هەورامیی بابەتێکی لەبارەی شێوەزاری هەورامییەوە پێشکەشکرد و وتی:”زمانی هەورامیی لە ڕووی وشەسازیی و ئەلفوبێ-وە دەوڵەمەندە و پێویستە گرنگیی بە زمانی هەورامی بدرێت، لەپێناو پاراستن و مانەوەی لە هەورامان”.
ئەو پسپۆڕەی شێوەزاری هەورامیی بەپێویستیشی دەزانێت، کە خوێندن لە سنووری هەورامان بە شێوەزاری هەورامیی بێت.
دواتر مامۆستا زوبێرهەورامی بابەتێکی لەبارەی پاراستنی کەلتوور و ژینگەی هەورامانەوە پێشکەشکرد و بەپێویستی زانیی، کە کار بکرێت بۆ پاراستنی کەلتووری ناوچەکە و لە شوێنە گەشتیارییەکان و بازاڕ و دوکانەکاندا تابلۆکان بە شێوەزاری هەورامی بنووسرێن.
جیهاد هەورامی، یەکێک لە ڕێکخەرانی دیدارەکە بە ڕۆژنیوزی ڕاگەیاند: سەرجەم ڕا و بۆچوونەکانی ئەم دیدارە کۆدەکەینەوە و لە پرۆژەیەکدا کاری لەسەر دەکەین و لەڕێگەی وەزارەتەکانی ڕۆشنبیریی، خوێندنی باڵا و پەروەردەوە ڕاسپاردەکان دەگەیەنینە حکومەتی هەرێم، بەمەبەستی خوێندن بە شێوەزاری هەورامی لە هەورامان، کردنەوەی بەشی شێوەزاری هەورامیی لە زانکۆی هەڵەبجە و کردنەوەی مۆنۆمێنتێک یان مۆزەخانەیەک لە هەورامان.
ب.ل
