بە دروشمی’با شیعر بکەینە سەنگەرێکی بەرگری’، سبەینێ کەرنەڤاڵێکی هونەری لە شاری سلێمانی ڕێکدەخرێت.
بڕیارە ڕۆژی دووشەممە کاتژمێر ٠٦:٠٠ی ئێوارە لە سەر مەزاری شێرکۆبێکەس لە پارکی ئازادی لە شاری سلێمانی، لەلایەن ڕێکخراوی نوێگەر بۆ گەشەپێدانی هونەری، بە دروشمی ‘با شیعر بکەینە سەنگەرێکی بەرگری’، کەرنەڤاڵێکی شیعری ئەنجام دەدرێت.
هەر یەک لە بەندی عەلی، ڕۆژ هەڵەبجەیی، فاتیح سەلام، سروە عوسمان، هەڵاڵە شەوکەت لهۆنی هاوشان عەزیز، ڕەوەند ساڵح و مەریوان قەرەداغی، ئەو شاعیرانەن کە لە شارەکانی هەولێر و سلێمانی بەشداری لەم کەرنەڤاڵەدا دەکەن.
کەرنەڤاڵەکە بە مەبەستی دروستکردنی سەنگەرێکی هونەری لە دژی هەموو داگیرکارییەکانی دەوڵەتانی دراوسێ و بە تایبەت دەوڵەتی تورکیایە لە سەر باشوری کوردستان و بەرهەمی بەشداران لە داهاتوودا لە کتێبێکدا کۆدەکرێتەوە.
س.ح
