لە مەراسیمێکدا لە شاری هەڵەبجە، پەردە لەسەر پەیکەری نووسەر و شاعیر’عوسمان محەمەد هەورامی’ لادرا.
مەراسیمەکە بەیانیی ئەمڕۆ لەناو حەوشەی بەڕێوەبەرایەتیی ڕۆشنبیریی و هونەریی هەڵەبجە، بە ئامادەبوونی کەسوکار، هاوڕێ، هونەرمەند و بەشێک لە بەرپرسانی ئیداریی پارێزگاکە بەڕێوەچوو.
پەیکەرەکە لەلایەن پەیکەرساز عومەر جەمیل و لەسەر ئەرکی بەڕێوەبەرایەتیی ڕۆشنبیریی وهونەریی هەڵەبجە دروستکراوە.
بەرزیی پەیکەرەکە ١٢٠سانتیمەتر و پانییەکەشی ١١٠ سانتیمەترە، ماوەی دروستکردنەکەی مانگێک بووە و لە ماددەی فایبەر گڵاس دروستکراوە.
ئەو پەیکەرسازە، لە لێدوانێکیدا بۆ ڕۆژنیوز هیوای خواست، کە دروستکردنی پەیکەرەکە، لە ئاست گەورەیی ئەو نووسەرەدا بێت.
هەروەها، كاردۆ عوسمان، كوڕی کۆچکردوو عوسمان محەمەد هەورامی، سوپاسی ئەو لایەنانەی کرد، کە هاوکاربوون لە دورستکردنی پەیکەرەکەدا و پێیوایە، کە پەیامێکە بۆ بەزیندوو هێشتنەوەی باوکی.
عوسمان محەمەد هەورامی لە ساڵی ١٩٤٠ لە شارۆچكەی تەوێڵە لەدایكبووە، خاوەنی ٢٧ بەرهەمی چاپكراوە، ١٤ بەرهەمی دیكەشی هەیە هێشتا چاپ نەكراوە، لەناو بەرهەمە چاپکراوەکاندا، ١٧ نامیلکەی شیعریی تایبەت بە منداڵان بووە، بەرهەمەكانی دیکەشی لەبواری زمانەوانی و پەروەردەییی و ئەدەبییدا بوە.
عوسمان محەمەد هەورامی، لە تەمەنی ٤٠ ساڵییدا و لە ١٥-١٠-٢٠٢٠ کۆچی دوایی کرد.
ش.ف
