ئاری بابان ١٠مین پێشانگەی تایبەتی لە كەركوك كردەوە

دەیەمین پێشانگەی تایبەتی هونەرمەندی شێوەكار ئاری بابان لە شاری كەركوك كرایەوە و بۆ ماوەی چوار رۆژ بەردەوام دەبێت.


ئێوارەی ئەمڕۆ لە هۆڵی سەنتەری رۆشنبیری كەركوك دەیەمین پێشانگەی تایبەتی هونەرمەندی شێوەكار ئاری بابان لە شاری كەركوك كرایەوە كە لە لایەن بەڕێوەبەرایەتی رۆشنبیری و هونەری كەركوك و بەڕێوەبەرایەتی گشتی رۆشنبیری و هونەری سلێمانی وەزارەتی رۆشنبیری و لاوانەوە ئەنجام درابوو.

پێشانگەكە٢١تابلۆ لە خۆدەگرێت و هەروەكو ئاری بابان شێوەکار وتی "تابلۆ بەشدارەكانی ئەم پێشانگەیە زیاتر باسی مرۆڤی تەنیا و بێدەنگ دەكات و كەسەكان لە پایزدا چۆن لە ژێر گریان و باران و گەڵای پایز دایپۆشیون، هەروەها ئەو مرۆڤانەی بەرجەستەی نێو تابلۆكان دەكەن و كێشراون بریندارن لەم بارودۆخەدا".

ئاری بابان هونەرمەندێكی دیاری بواری وێنەكێشانە و بەشداری لە نزیكەی ١٦٠پێشانگە لە كوردستان و عێراق و وڵاتانی دەرەوە كردووە، یەكەم پێشانگەی هونەری خۆی هەر لە شاری كەركوك لە ساڵی١٩٧٠كردووەتەوە و لە ئێستاشدا١٠مین پێشانگەی تایبەتی ئەو هونەرمەندە لە كەركوك بۆ ماوەی چوار ڕۆژ بەردەوام دەبێت.

ب.ش.