ئاسایشی سلێمانی ڕێگری كرد لە كردنەوەی پێشانگایەكی تایبەت بە ساڵیادی شەنگال

ئاسایشی سلێمانی، بە بیانووی نەبوونی مۆڵەتی ئاسایش، ڕێگری كرد لە كردنەوەی پێشانگای فۆتۆگرافەر ناسیح عەلی خەیات و شێرۆ هیندی، كە تایبەت بوو بە ساڵیادی كۆمەڵكوژی ئێزدییەكان و داگیركردنی شەنگال لەسەر دەستی داعش.  


ڕێكخراوی نیگار بۆ گەشەپێدانی هونەری بڕیاربوو ئێوارەی ئەمڕۆ لە بەردەم باخی گشتی سلێمانی، پێشانگایەكی فۆتۆگرافی بۆ ناسیح عەلی خەیات و شێرۆ هیندی بكاتەوە، كە تایبەت بوو بە ساڵیادی كۆمەڵكوژكردنی ئێزدییەكان لەسەر دەستی چەتەكانی داعش، بەڵام ئاسایشی سلێمانی بە بیانووی نەبوونی مۆڵەتی ئاسایش، ڕێگەی نەدا پێشانگاكە بكرێتەوە.

ڕێكخراوی نیگار بۆ گەشەپێدانی هونەری، پێشتر مۆڵەتی بەڕێوەبەرایەتی گشتی ڕۆشنبیری و هونەری سلێمانیان بۆ پێشانگاكە وەرگرتبوو، بەڵام ئاسایش پێی ڕاگەیاندوون كە دەبوو مۆڵەتی ئەوانیشیان وەربگرتایەت.

ناسح عەلی خەیات، فۆتۆگرافەرێكی خەڵكی سلێمانییە و لە كاتی تاوانی كۆمەڵكوژكردنی ئێزدییەكان و داگیركردنی شەنگال لەلایەن چەتەكانی داعش لە ساڵی ۲۰۱٤، ماوەی ڕۆژ 13 ڕۆژ لە چیای شەنگال مابووەوە، بڕیاربوو ئەمڕۆ ۲۳فۆتۆی تایبەت لە سەر ئەو تاوانە نمایش بكات.

فۆتۆ/ناسیح عەلی خەیات

د.ح