ئاكەپە گۆڕی شەرەفخانی بەدلیسی وێرانكرد

شارەوانیی ئاكەپە لە بەدلیس پێش كۆكردنەوە و لابردنی تابلۆ كوردییەكان، هێرشی كردە سەر گۆڕی شەرەفخانی بەدلیسیی نووسەر و مێژوونووسی بەناوبانگی كوردو تێكیدا.


ئاكەپە لە شارەكانی كوردستان بەردەوامە لە پاكتاوكردن و سڕینەوەی سیاسی و كولتوریی گەلی كورد و دوژمنایەتییەكەی لەگەڵ كورد لە دوای هەڵبژاردنی شارەوانییەكان لە 31/3/2019، بەردەوامی هەیە و نمونەیەكیش لەو دوژمنكارییەی ئاكەپە ئاشكرا بوو، یەكێك لەو هێرشە پاكتاوكارییەی ئاكەپە لە دژی گەلی كورد لە بەدلیس دەركەوت، ئەمجارە هێرشی كردە سەر گۆڕی سیاسەتمەدار و مێژوونووسی ناوداری كورد شەرەفخانی بەدلیسی و بنەماڵەكەی و گۆڕەكانیان وێرانكردن.


شەرەفخانی بەدلیسی لە ساڵانی ١٥٤٣ بۆ ١٦٠٣ ژیاوە، سەر بە بنەماڵەی میرانی بەدلیس بووە و بۆ خۆیشی ماوەیەك میری بەدلیس بووە، نووسەر و مێژوونووسی دیاری كورد بووە و یەكێك لە گرنگترین و دیارترین نووسەر و ڕۆشنبیرەكانی سەردەمی خۆی بووە.


شەرەفخان بە نووسینی كتێبی شەرەفنامە ناو و ناوبانگی بۆ هەمیشە پایەدار كردووە، لە شەرەفنامەدا زانیاریی ورد لەبارەی مێژووی كورد و كوردستان، دۆخی ئابووری و سیاسی و كۆمەڵایەتی كورد،  جوگرافیای كوردستان، خێڵ و هۆز و تیرە و پێكهاتەكانی كوردستان و ئایینەكانی كۆمەڵگەی كوردستان خراونەتەڕوو.


پارتی هەرێمە دیموكراتییەكان دەبەپە(DBP) لە هەڵبژاردنی شارەوانی لە ساڵی ٢٠١٤دا بە ڕێژەیەكی بەرز لە بەدلیس سەركەوتبوو، بەڵام حكومەتی ئاكەپە قەیومیی بەسەر شارەوانیدا سەپاند و لە دژی كولتور و زمانی كوردی دەستی بە پاكتاوكاری كرد.


ئاكەپە لە چوارچێوەی ئەو پاكتاوكارییەدا باخچەكانی ساوایان و كاروبارەكانی بواری كولتوری و ڕۆشنبیریی كوردیی قەدەغە كرد، ئاكەپە لە بەردەوامیی ئەو سیاسەتەیدا پێش هەڵبژاردنە خۆجێیەكانی31/3/2019 و دوای ئەوەش هەزاران سیاسەتمەدار و وڵاتپارێزی دەستگیر و زیندانیكرد.


تابلۆی شارەوانیی بەدلیس، كە بە كوردی و توركی لە سەردەمی شارەوانیی دەبەپەدا لە بەردەم بینای شارەوانیی بەدلیس دانرابوو بە فەرمانی نەسروڵا تانگلای سەرۆك شارەوانیی ئاكەپە، كە دوای هەڵبژاردنی شارەوانییەكان هەڵبژێردرابوو لابرا، لە جێگەی ئەو تابلۆیە، تابلۆیەك لە بەردەم شارەوانیی بەدلیس دانرا، كە تەنها بە زمانی توركی لەسەری نووسرابوو (شارەوانیی بەدلیس).


هەروەها تانگلای سەرۆك شارەوانیی ئاكەپە، دوای ماوەیەك لە دەستبەكاربوونی ئەو تابلۆیەی لابرد، كە دەروازەی شاری بەدلیس دانرابوو و بە كوردی، توركی و ئینگلیزی لەسەری نووسرابوو "بەخێر بێن بۆ بەدلیس". ئەو سەرۆك شارەوانییەی ئاكەپە لە جێگەی ئەو تابلۆیە، تابلۆیەكی دانا كە تەنها بە توركی لەسەری نووسراوە "بەخێر بێن بۆ بەدلیس".


ئاكەپە لە بەردەوامیی سیاسەتەكەیان بۆ پاكتاوكردن و سڕینەوەی سیاسیی گەلی كورد لە شاری تاتوانیش خۆیان لە بەرامبەر تابلۆ بە زمانی كوردی پێ رانەگیرا، بۆیە سەرۆك شارەوانیی تاتوانی ئاكەپە ئەو تابلۆیەی بەردەم بینای شارەوانیی تاتوانی لابرد، كە بە كوردی لەسەری نووسرابوو، شارەوانیی تاتوان.


قەدەغەكردنی زمان و كولتوری كوردی و بەهاكانی گەلی كورد لە سەردەمی دەسەڵاتی ئاكەپە – مەهەپە دا بە بەرنامەیەكی ورد و چڕوپڕ بەڕێوەدەچن.


لە زۆربەی شارەكانی باكوری كوردستان خوێندنگە كوردییەكان، مۆنۆمێنتەكان بۆ یادەكانی پەیوەندیدار بە كوردەوە، پەیكەری كەسایەتییەكان، تابلۆ كوردییەكان و ڕێكخراوە كوردییەكان قەدەغەكران و تەنانەت نكوڵیشیان لە بوونی گەلی كورد و كوردستان كرد.


د.ح