بۆ یەكەم جار لە گوندێكی كەركوك كتێبخانە دەكرێتەوە

لە گوندێكی کوردنشینی كەركوك كتێبخانەیەك کرایەوە، کە ڕاستەوخۆ لەلایەن كتێبخانەی گشتی كەركوكەوە سەرپەرشتی دەكرێت و ئەویش بە حكومەتی عێراقە.


ئەمڕۆ کە هاوکاتە بە ساڵیادی ڕۆژنامەگەریی کوردی، لە گوندی حەساری گەورەی سەر بە شارەدێی پردێ لە پارێزگای كەركوك، بۆ یەكەمین جار كتێبخانەیەكی فەرمی كرایەوە.

لە مەراسیمی كردنەوەی كتێبخانەكەدا، جگە لە هاوڵاتییانی گوندەکە، كەسایەتی ڕۆشنبیر، سیاسی و پەرلەمانتارانی عێراق کە، كوردی كەركوكی-ن ئامادەبوون و لەلایەن ئەوانیشەوە كۆمەڵێك كتێب بە كتێبخانەكە بەخشرا.

كتێبخانەكەی گوندی حەساری گەورە كۆمەڵێك كتێبی كۆكردووەتەوە و بەشێكیشی لەلایەن خەڵكی جیاجیاوە پیاندەدرێت، جگە لەخوێندنەوە لە كتێبخانەكەدا ژوورێكی هونەری دانراوە بە ناوی (تەبا) كە كۆمەڵێك ئامێری میوزیکی تێدایە، بڕیارە لە ئایندەیەكی نزیكدا بۆ فێركاری بەكاربهێنرێت و وەك بەڕێوبەرانیشی ئاماژەی بۆ دەكەن، لە داهاتوودا دەكرێت بە ناوەندێكی رۆشنبیرییی.

ئەم كتێبخانەیە شوێنی بیناكەی سەر بە وەرزش و لاوانی كەركوكە، هاوكاریشی لەلایەن كتێبخانەی گشتی كەركوكی سەر بەحكومەتی عێراقی و كەسانی خۆبەخش لە ناوە و دەرەوەی وڵات كراوە.

گوندی حەسار دەكەوێتە باكوری شاری كەركوكەوە و لە ڕووی ئیدارییەوە سەر بە شارەدێی پردێیە، گوندێكی كوردنشینە و چەندین كەسایەتی رۆشنبیر لەو گوندە سەریان هەڵداوە، وەک مێژوونووسان حەكیم كاكەوەیس، جەلیل كاكەوەیس و حەمە كەریم عارف.

س.ح