بۆ یەکخستنی هەڵوێستیان هونەرمەندان لە هەولێر کۆبوونەوە

هەوڵی هونەرمەندانی چوار پارچەی کوردستان کە لە ئەوروپاوە بۆ یەکخستنی ناوماڵی کورد دەستیپێکرد بەردەوامە، لەو چوارچێوەیەدا چوار لەو هونەرمەندانەی کە پێشەنگایەتیی ئەو کارە دەکەن بۆ یەکخستنی هەڵوێستیان و دروستکردنی یەکێتی نەتەوەیی لە هەولێر لەگەڵ هونەرمەندان کۆبوونەوە.


ئەمڕۆ لە هۆڵی هۆتێل چوارچوار لە شاری هەولێر، هەریەکە لە هونەرمەندان شڤان پەروەر، دیار دێرسیم، خەلیل خەمگین و نازدار جەزیری کە لە ئەوروپاوە بەسەردان هاتوونەتەوە باشوری کوردستان و پێشەنگایەتیی بۆ خەباتی یەکێتیی نەتەوەیی هونەرمەندانی کوردستان دەکەن، لەگەڵ هونەرمەندانی سنووری پارێزگای هەولێر کۆبوونەوە بۆ گفتوگۆکردن لەبارەی ڕۆڵی هونەرمەندان لە پێکهێنانی یەکێتیی نەتەوەیی کورددا.

کۆبوونەوەکە بەردەوامیی کار و چالاکییەکانی هونەرمەندانی کوردستانی گەورەیە لە ئەوروپا، کە لە ماوەی ڕابردوودا کۆنسێرتی گەورەی یەکێتی نەتەوەییان لە شاری کۆڵن-ی وڵاتی ئەڵمانیا بەڕێوەبرد و ڕۆژی ١٠ی ئەم مانگەش دوو لەو هونەرمەندانە لەگەڵ هونەرمەندانی سلێمانی کۆبوونەوە و پلاتفۆرمی هونەرمەندانی سلێمانی-یان پێکهێنا.

دیار دێرسیم، هونەرمەندی دیاری باکوری کوردستان، لە بارەی کۆبوونەوەکەی ئەمڕۆیان لەگەڵ هونەرمەندانی شاری هەولێر، بۆ ڕۆژنیوز، وتی: لەکۆبونەوەکەماندا کە تیایدا هونەرمەندانی هەرچوارپارچەی کوردستانیش بەشداربوون، گفتوگۆمانکرد بۆ ئەوەی لەداهاتوودا تەواوی هونەرمەندان لە چوارچێوەی هەڵوێستێکی نیشتیمانیدا داوای یەکێتی نەتەوەیی کورد بکەین، چونکە هونەرمەدان دەتوانن ڕۆڵی سەرەکی ببینن لە کۆکردنەوەی تەواوی هێز و لایەنە سیاسیەکان لەچوارچێوەی یەک گوتاری سیاسیدا.

ئەو هونەرمەندە ئاماژەی بەوەشدا کە وڵاتانی داگیرکەر بەردەوام کار بۆ ئەوە دەکەن گەلی کورد ببێتە ژێردەستە و بی چەوسێنێتەوە و گوند و دێهاتەکانی خاپوور بکات.

ئەوەشی خستەڕوو، کە بەداخەوە گەلی کورد بەهۆی کۆمەڵێک بەرژوەندی هەندێک لایەنەوە ناتوانن کۆببنەوە، بۆیە ئێمە کاردەکەین، تا تەواوی ئەو هێز و لایەنانە لە هەر چوار پارچەی کوردستان کار بۆ دروستکردنی یەکێتی نەتەوەیی بکەن و واز لەبەرژەوەندی حزبی بهێنن، چونکە ئێستا کاتی شۆڕش و بەرخودانە دژی داگیرکەران.

ک.س