بە هونەر ڕووبەڕووی توندوتیژیی دەبنەوە

دوو شێوەکاری شارۆچکەی خانەقین بە نەخشاندنی ڕووخساری ژن لەسەر دیواری خویندنگایەک، پەیامی ڕووبەڕووبوونەوەی توندوتیژیی دەدەن.


دوای پێنج ڕۆژ کارکردن، دوێنێ هەردوو شێوەکار (دیانا ماهیر و کەرار کامەران)، بە پشتیوانیی لیژنەی کاری هەرەوەزیی لە خانەقین، کۆتاییان بە کاری نەخشاندنی دیواری خوێندنگای خانەقین-ی بنەڕەتیی هێنا، لە شارۆچکەی خانەقین-ی سەر بە پارێزگای دیالە.

ئەو دوو شێوەکارە دیواری خوێندنگاکەیان بە ڕووخساری ژن نەخشاندووە  و ڕەنگێکی زۆریان تێدا بەکارهێناوە، وەک خۆشیان باسی دەکەن، دەیانەوێت بەو کارە سەرنجی هاوڵاتیان ڕاکێشن بۆ ڕووبەڕووبوونەوەی توندوتیژیی دژی ژنان.

دیانا ماهر، دەرچووی پەیمانگای هونەرە جوانەكانی خانەقین وتی: ئەمە هونەری دیواربەندییە و دەمانەوێت لەڕێگای ئەم كارە هونەریەوە خەڵک هۆشیاربکەینەوە، كە دژی توندوتیژیی سەر ژنان بن.

هەروەها، كەرار كامەران، کە خوێندكاری پەیمانگای هونەرە جوانەكان و ئەندامی لیژنەی کاری هەرەوەزیی خانەقین-ە، وتی: پەیامی ئێمە ئەوەیە، کە توندوتیژیی دژ بە ژنان قبوڵ ناکەین، هەروەها ئامانجێکی دیکەمان جوانكردنی خانەقینە بە کاری هونەریی.

ش.ف