بە چالاكی هونەریی یادی وەستاندنی جەنگی عێراق و ئێران كرایەوە.. بە وێنە

لە ٣٠یەمین ساڵیادی وەستاندی شەڕی هەشت ساڵەی نێوان عێراق- ئێران، ناوەندی كلتوری چۆمان و ڕێكخراوی شاخەوانی هەڵگورد، بە چەندین چالاكی هونەریی و بە خوێندنەوەی بەیاننامەیەك ئەو یادەیان كردەوە.


ئێوارەی ئەمڕۆ لە گوندی مژدێنیانی سەر بە شارۆچكەی چۆمان یادی وەستاندنی جەنگی هەشت ساڵەی نێوان عێراق و ئێران كرایەوە، یادەكەش لە ناوەڕاستی كێڵگەیەكی مین و سنوری نێوان عێراق ئێران بەڕێوەچوو.

سەرەتای چالاكیەكە بە چەندین سرود و مۆسیقا دەستی پێكرد و ئەوەش وەك ئاماژەیەك بۆ وەستاندی جەنگ و دەستپێكردنەوەی ژیان لە شوێنی جەنگ، دواتر لە لایەن چەند شێوەكارێكی كچ و كوڕ بە كێشانی چەندین تابلۆ، كە ئاماژەی كۆتایی جەنگ و كوشتن بوو، بەردەوام بوو.

لە بەردەوامی چالاكیەكەدا زۆسك باڵەك، بەیاننامەیەكی هاوبەشی هەردوو ناوەندی كلتوری چۆمان و گروپی شاخەوانی هەڵگورد خوێندەوە، كە تێیدا باس لەو دۆخە خراپەی شەڕی هەشت ساڵەی نێوان (عێراق- ئێران) كرا كە دانیشتوانی باڵەكایەتی و جوتیار و باخەوانەكانی سنورەكەی توشی نەهامەتی كردبوو، تا ئێستاشی پێوە بێت باڵەكایەتی هەر قوربانیدەری جەنگەكەیە بەهۆی ئەو كێڵگە مین و تەقەمەنیانەی لە سنورەكەدا هەن.

لە بەشێكی دیەی بەیاننامەكەدا هاتبوو: بەهۆی كێڵگە بەمین چێنراوەكانی باڵەكایەتی تا ئێستا ٧٢٣ كەس بریندار بوون و ٥٩٢ كەسیش گیانیان لەدەستداوە.

ئاماژە بەوەش كرا: كە دەزگای مین و حكومەتی هەرێم بایەخێكی جدی بە سنورەكە نەداوە، كە بتوانرێت بە زوویی كێڵگە مینڕێژكراوەكان لەناوببرێن، كە تا ئێستا  ٢٠٦ كێڵگەی بە مینداچێنراون و تا دەشچێت مەترسیەكانی مین لەسەر سنورەكە زیاتر دەبن بەهۆی ئاوەدانبوونەوەی سنورەكە و بوونی بە شوێنێكی گەشتیاری و كشتوكاڵ و ئاژەڵداریی، كە بەشێكی زۆری كێڵگە مینەكان نزیكی ئاوەدانین و لە سەردەمی شەڕی هەشت ساڵەدا چێنراون.

لە كۆتایی بەیاننامەكەدا هاتبوو، كە "داواكارین حكومەتی ناوەند، كەیسی ڕاگواستنی زۆرەملێ و قوربانیانی جەنگی هەشت ساڵەی (عێراق- ئێران) لە باڵەكایەتی بە جنۆساید بناسێنێت و لە بودجەی ساڵانە بڕێكی تایبەت تەرخان بكەن بۆ ئاوەدانكردنەوەی ناوچەكە و نەهێشتنی ئاسەواری جەنگ و قەرەبووكردنەوەی زیان لێكەوتووان".

ك.ك/ز