شانۆ کۆیه‌ و کفری بردە‌ که‌رکوک

به ‌بۆنه‌ی ڕاگه‌یاندنی پێنجه‌مین فیستیڤاڵی نێوده‌وڵه‌تی شانۆی شه‌قام له‌ که‌رکوک، میوانداری شانۆی (عه‌ریزەنووس)ی کۆمه‌ڵێ شانۆکاری شاری کۆیه‌ و شانۆی (کچه‌ ئازاکه‌)ی شاری کفری له‌ که‌رکوک کرا.


ناوه‌ندی ڕێکخراوه‌ دیموکراتییه‌کانی که‌رکوک و گروپی شانۆیی هه‌وار، ئەمڕۆ میوانداری شانۆکارانی کۆیه‌ و کفریان کرد و به‌ دوو نمایش و له‌ دوو کاتی جیادا، شانۆیی شه‌قامیان له‌ نێو جه‌ماوه‌ری که‌رکوکدا نمایش کرد.

سەرەتا کاتژمێر ١٠:٣٠ی بەیانی له‌نێو زانکۆی که‌رکوک و له‌نێو فێرخوازاندا هه‌ردوو گروپی (شانۆ بۆ شانۆی کۆیه‌ و په‌یمانگه‌ی هونه‌ره ‌جوانه‌کانی کفری) دوو نمایشی جیایان ئه‌نجامدا به‌ ناوه‌کانی (عه‌ریزه‌ نووس) کۆیه‌، (کچه‌ ئازاکه‌) کفری.

دواتریش کاتژمێر ٣ی پاشنیوه‌ڕۆ هه‌مان ئه‌و دوو شانۆیه‌ له‌ نێو بازاڕی ڕه‌حیماوای شاری که‌رکوک له‌ نێو خه‌ڵکدا نمایش کران و پاشان له‌ لێدوانێکدا پێنجه‌مین فیستیڤاڵی شانۆی شه‌قام له‌ که‌رکوک ڕاگه‌یه‌ندرا.

نه‌ژاد نه‌جم وه‌ک یه‌کێک له‌ ڕێکخه‌رانی فیستیڤاڵی شانۆی شه‌قام له‌ که‌رکوک بۆ ڕاگه‌یاندنه‌کان وتی: "به‌ چه‌ند نمایشێک به‌ کرداریی پێنجه‌مین فیستیڤاڵی شانۆیی شه‌قامی که‌رکوکمان ڕاگه‌یاند، که‌ له‌ مانگی ئازاری ساڵی ٢٠١٩ به‌ به‌شداری پێنج وڵات ده‌ستپێده‌کات، که‌ ئه‌وانیش وڵاتانی ئێران و میسر و ئوردن و سوریا و تورکیان، له‌گه‌ڵ شاره‌کانی عێراق و کوردستان".

وتیشی: "فیستیڤاڵه‌که‌ به‌ کۆمه‌ڵێ نمایش و کۆڕ و سیمینار له‌ شاری که‌رکوکدا بۆ ماوه‌ی چوار ڕۆژ به‌رده‌وام ده‌بێت".

ک.ک