شوێنەواری یەکەمین سیستمی ئیدارەی جیهان لە هەولێر دۆزرایەوە

له‌هه‌ردوو گوندی عه‌لیاوه ‌و هێڵه‌وه، لەپارێزگای هەولێر، لەلایەن به‌ڕێوه‌به‌رایه‌تیی شوێنه‌واری هه‌ولێر و تیمێكی زانكۆی میلانۆی ئیتاڵیا، شوێنەوارێكی مێژوویی و نزیكەی ٢ هەزار پارچه‌ی شوێنه‌وار دۆزرانه‌وه‌، لەنێویاندا مۆرێكی قوڕینی تێدایە، كە بەوتەی تیمە ئیتاڵییەكە "به‌ یه‌كه‌مین سیستمی ئیداره‌ داده‌نرێت له‌هه‌موو جیهان".


ئه‌مڕۆ، له‌ كۆنگره‌یه‌كی ڕۆژنامه‌وانیدا لە بەڕێوەبەرایەتی شوێنەواری هەولێر،  بەڕێوەبەری پشکنین لە به‌ڕێوه‌به‌رایه‌تیی شوێنه‌واری هه‌ولێر و تیمێكی زانكۆی میلانۆی ئیتاڵیا، ئه‌نجامی پشكنینی شوێنه‌واری هه‌ردوو گوندی عه‌لیاوه ‌و هێڵه‌وه‌ لە سنوری شارۆچکەی مەخموری سەر بە هه‌ولێریان ڕاگەیاند، دۆزینەوەی بینایەكی شوێنەواری و نزیكەی ٢ هەزار پارچه‌ی شوێنه‌واریی "زۆر گرنگ و ده‌گمه‌ن" ئاشكراكرا.

گۆران محەمەد، بەڕێوەبەری پشکنین لە بەڕێوەبەرایەتیی شوێنەواری هەولێر ڕایگەیاند: لەساڵانی نێوان ٢٠١٣ بۆ ٢٠١٥ پشكنین لە گوندەكانی هێڵەوە و عەلیاوە بەردەوامبووە و بە چوار قۆناغ ئەو شوێنەوارانە دۆزراونەتەوە.

‌هەر لە كۆنگره‌ رۆژنامەوانییەكه‌دا، لوكا بیرۆنیل، مامۆستای شوێنه‌وار له‌ زانكۆی میلانۆ و به‌ڕێوه‌به‌ری تیمە شوێنه‌وارییە ئیتاڵییەكە رایگه‌یاند:"بڕیارماندا كار له‌ گوندی هێڵه‌وه‌ بكه‌ین، چونكه‌ شوێنه‌كە ده‌وڵه‌مه‌نده‌ به‌ شارستانییه‌تێكی مه‌زن، كشتوكاڵ و ئاژه‌ڵداریی تێدا کراوە و به‌شێوه‌یه‌كی پێشكه‌وتوو توانیویانه‌ گوند بگۆڕن بۆ شارۆچكه‌ و دانیشتوانه‌كه‌شی تایبه‌تمه‌ند بوون‌ به‌ كاری نه‌خش و ده‌ستڕه‌نگینی و بواری بازرگانیی."

مامۆستا ئیتاڵییەكە، وتیشی:"مێژووی هێڵه‌وه‌ ده‌گه‌ڕێته‌وه‌ بۆ ٥ هه‌زار ساڵ پێش زایین له‌ شارستانیه‌تی میزۆپۆتامیا، به‌گوێره‌ی كاری هه‌ڵكۆڵینه‌كه‌ دەركه‌وتووه‌ پێش ٣٥٠٠ ساڵ ئه‌و شوێنه‌ چۆڵكراوه."

لوكا بیرۆنیل ئاماژه‌ی به‌وه‌شكرد:"بۆ ئاشكراكردن و زانینی چۆنیه‌تی ئه‌و شوێنه‌واره،‌ بڕیارماندا به‌ پشكنینی تەواوی گرده‌كەی هێڵه‌وه‌ به‌ به‌رزیی ٢٣ مه‌تر، شوێنه‌واره‌كە ٢٣ مه‌تر چین چین له‌سه‌ریه‌كتر بووه، له ‌سه‌رووی شوێنه‌واره‌كه‌ شوێنێكمان دۆزییه‌وه‌ كه‌ پێشبینی ده‌كرێت په‌رستگا بووبێت و پێش ٥ هه‌زار ساڵ لەمەوبەر دروستكراوه، له‌ یه‌ك ژوور پێكهاتووه‌، هەر لەوێ مۆری قوڕینی بچووكمان دۆزییه‌وه‌ كه‌ نه‌خش و نیگاری مرۆڤ و ڕووه‌ك و ئاژه‌ڵی له‌سه‌ر نه‌خشێندراوه‌‌، ئه‌و شێوازه‌ مۆره‌ به‌ یه‌كه‌مین سیستمی ئیداره‌ داده‌نرێت له‌ هه‌موو جیهان".

شوێنەوارناسە ئیتاڵییەكە ئاماژەی بە كۆمەڵێك كەرەستە و شوێنەواری دیكەی مێژوویی كرد، كە لەهەردوو گوندی هێڵەوە و عەلیاوە دۆزیویانەتەوە، وتی:"كۆمه‌ڵێك قاپمان دۆزییه‌وه‌ كه‌ به‌كارهاتووه‌ بۆ پێدانی خواردن به‌ كرێكاران و خه‌ڵكی ناوچەكە، جگه‌ له‌وه‌ هه‌ندێك كه‌لوپه‌لی ده‌گمه‌ن و گرنگمان دۆزیه‌وه‌، وه‌كو قاپی به‌ردین و كەرەستەی جوانكاری و به‌ردی ئۆبسید، كە بەردێكی شووشه‌یی بوركانییه‌ و لە ئەنادۆڵەوە‌ بۆ هێڵه‌وه‌ نێردراوه‌".

پسپۆڕه‌ ئیتاڵییەكە ئاشكراشیكرد، به‌رده‌وام ده‌بن له‌ پشكین له‌ گونده‌كانی سنووری پارێزگای هه‌ولێر، چونکە پێشبینی دەکرێت شوێنەواری گرنگ و دەگمەنی دیكە هەبن.

ش.ف