شەشەمین فیستیڤاڵی خۆراكی گیایی و سروشتی لەهەڵەبجە بەڕێوەچوو

بە بەشداری ٤۰ ژن و بەدروشمی بەخۆراكی گیایی ژیانمان تەندروست دەكەین، شەشەمین ڤیستیڤاڵی خۆراكی گیایی و خواردنی سروشتی لەهەڵەبجە بەڕێوەدەچێت كە تێیدا ٦۰ جۆر گیای سروشتی نمایش كرا.


ئەمڕۆ فیستیڤاڵەكە لەپاركی شاری یاری هەڵەبجە، بەڕێوەدەچێت و لەلایەن ڕێكخراوی نوێ بۆ پاراستنی ژینگەو مافەكانی ژنان و ڕێكخراوی ئارامی هەڵەبجە بۆ پاراستنی مرۆڤ و ژینگە ئامادەكاری بۆ كراوە.

لەڤیستیڤاڵەكەدا ٦۰ جۆر گیای سروشتی، بە بەشداری ٤۰ ژن نمایش كراوە، بەوتەی ڕێكخەرانیشی ئامانج لەفیستیڤاڵەكە ئەوەیە نەوەی نوێ ئاشنا بكرێت بە گیا سروشتییەكان، جۆر و شێوازەكانیان و ئەوانەی بەكەڵكی خواردن دێن، هەروەها گرنگیدان بەتەندروستی هاوڵاتیان و هۆشیاركردنەوەیان لەسودەكانی خۆراكی گیایی و دوركەوتنەوەیان لەخۆراكی نا تەندروست و بەسەرچوو، وە گرنگی بدرێت بە ژینگە و سەرجەم ئەو خۆراك و ئاو هەوایەی كەڕۆژانە بەكاریان دەهێنین.

ئامانجێكی دیكەی فیستیڤاڵەكە ئەوەیە، بازاڕێك بۆ خۆراكە گیاییەكان دروستبكرێت بۆ ساغكردنەوەی بەرهەمەكان، بۆ ئەوەی هاوڵاتیانی شاری هەڵەبجە و دەرەوە كە سەردانی فیستیڤاڵەكە دەكەن سود لە بەرهەمە گیاییەكان وەربگرن.

ئەو گژوگیا سروشتیانەی لەڤیستیڤاڵەكە نمایشكرابوون بریتی بوون لە: (تۆڵەكە، گێلاخە، گۆزروان، كوزەڵە، شویت، گەبڵە، قەرنابیت، سەییاران، برۆكلی، بەڕەزا، گەڵامێو، نەعنا،پوینە،ڕێواس، كەرەوس، شنگ، قارچك، پیشۆك، بەنۆڵە، هاز، گلك، زەنجەفیل، كەوەر، كەرەوز، هەڵاڵە،پیرەژنانە، تریشكە، ڕێحانە، هاڵەكۆك، گەزەنێ، تەڕەتیزە، بنسور، مەنێ،پسڵ، كنیواڵ، جەرجیر، مەعدەنووس، درزیلە، شیرین شاتەڕە،پەپۆ كەڵەشێر، خەرتەلە، چاوبازە، گنۆر، ڕوسكە، كاشمە،تەڕلە و خۆشە ڕێواس) فیستیڤاڵەكەش تا ئێوارەی ئەمڕۆ بەردەوام دەبێت.

ك.س