فێستیڤاڵی ڕۆژی ڕواندز بەڕێوەدەچێت

بە ئامادەبوونی هاوڵاتیانی شارۆچکەی ڕواندز و دامودەزگا حكومی و حزبییەکان، 11ـەمین فێستیڤاڵی ڕۆژی رواندز لە ژێر دروشمی "داهاتوویەكی گەش" دەستی پێكرد.


ئەمڕۆ کاتژمێر ١٠:٣٠، فێستیڤاڵی ڕۆژی ڕواندز لە شارۆچکەی ڕواندز-ی سەربە پارێزگای هەولێر دەستیپێکرد، بڕیارە تا کاتژمێرەکانی ئێوارە بەردەوامیی هەبێت.

فێستیڤاڵی ڕۆژی ڕواندز ئەم ساڵ لە  سەیرانگای بێرۆیان كە دەكەوێتە باشوری رواندزەوە بەڕێوەدەچێت، دەستپێكی فێستیڤاڵەكەش بریتی بوو لە  سرودی ئەی ڕەقیب و پێشكەشكردنی وتاری لیژنەی فێستیڤاڵ و ئیدارەی ڕواندز، کە تێیدا ئاماژەیان بۆ ئەوە كرد، ئامانجیان لە بەردەوامیدان بە  فێستیڤاڵی ڕۆژی ڕواندز بەردەوامیدانە بە كلتوری پێكەوەژیان و پارێزگایكردن لە نەریتە جوانەكانی ئەو سنوورە.

لە فێستیڤاڵی ئەم ساڵدا، لەلایەك پەیمانگای هونەرەجوانەكانی ڕواندز بە پێشكەشكردنی چەندین ئاواز و گۆرانی فلكۆری تایبەت بە دەڤەری رواندز و دانیشتوانی شارۆچکەکەش بە پێشانگای فۆتۆگرافی و پێشكەشكردنی خواردن و بەرهەمە دەستیەكانی ڕواندز جۆش و خرۆشی زیاتریان بە فێستیڤاڵەكەداوە.

جێگای ئاماژەیە، ساڵانە فێستیڤاڵی ڕۆژی رواندز لە 10/4 ئەنجام دەدرێت، بەڵام ئەم ساڵ بەهۆی ناجێگیری كەشوهەواوە دواخرا بۆ ئەمڕۆ.

س.ح