قەسرێ، لە ئێوارە كۆڕێكدا گرنگی ئەدەب لە پاراستنی نەتەوەدا خرایە ڕوو

ناوەندی ڕۆشنبیریی قەسرێ هەستا بە سازدانی ئێوارە كۆڕێك بۆ ڕۆماننووس و وەرگێڕ فەرهاد چۆمانی، كە باسی لە ئەزمونی وەرگێران و نوسینی خۆی كرد و تێیدا تیشكی خستە سەر گرنگی ئەدەب وەك هۆكارێك بۆ پاراستنی شوناسی نەتەوە.


لەدرێژەی كارو چالاكیەكانیدا، كاتژمێر 5:00ی سەر لە ئێوارەی ئەمڕۆ ناوەندی ڕۆشنبیری قەسرێ‌  بە بەشداری بەشێكی زۆر لە توێژەكانی قەسرێ لە شارەدێی قەسرێی سەر بە شارۆچكەی چۆمان ئێوارە كۆڕێكیان رێكخست بۆ ڕۆماننوس و وەرگێڕ فەرهاد چۆمانی.

فەرهاد چۆمانی سەرەتا باسی گرنگی ئەدەبی كرد كە چەندە گرنگە بۆ كۆمەڵگەو بۆ مرۆڤایەتی كە بەرپرسیارەتی بەرامبەر زمان و فەرهەنگی هەر نەتەوە و گەلێكە، بەتایبەت بۆ ئێمەی كورد ئەدەب زۆرگرنگە، چونكە ئێمە میللەتێكین بەردەوام فشارمان لەسەربووە، كە هەوڵدراوە پارچە پارچە كراوین و هەوڵ بۆ لەناو بردنی زمان و ئەدەب و فەرهەنگی كوردی دراوە.

فەرهاد دواتر باسی لە ئەزمونی نوسین و وەرگێرانی خۆی كرد و وتی، وەرگێڕان و نوسین بەرپرسیارەتیەكی گەورەیە بۆ هەركەسێك كە دەست بۆ ئەو بوارە ببات، چونكە  كەسانێك هەن كتێب وەردەگێڕن یان ئەنوسن، وەك پێویست نەیانتوانیوە ئەو بەرپرسیارەتیە هەڵگرن، كە زمانیان بە ئاراستەیەك بردووە خوێنەر یان ئەدەب دۆستیان ترساندووە لەكتێب و نوسەران.

دوای باسكردنی یەك بەیەكی بەرهەمەكانی خۆی فەرهاد چۆمانی باسی لە هەردوو كتێبەكانی سەحەرو دەورانكرد و وتی، ئەدەب بۆ سیاسیەكان زۆرگرنگە، كە بتوانن خەباتی گەلەكەیان و تێكۆشانەكان لەچوارچێوەی ئەدەبدا یاداشتبكەن، سەیركەن ئێستا لە باكور ئەو مۆدێلە جوانەی سیاسەتكردن هەیە كە دەمیرتاش وێنای دەكات لە زیندانەوە ئێش و ئازارەكانی گەلەكەی بە رۆماندەگێڕیتەوە و لەچوارچێوەی چیرۆكەكان باسیاندەكات و چیرۆك چیرۆك لە زیندانەوە ئازاددەبن بەڕوی خوێنەرانیان.

باسی ئەوەشی كرد، كە لە هەرێمی كوردستان ئەگەر ئەدەب دۆست لێی بدرێت یان دەستگیربكرێت یان بكوژرێت، لە لایەن سیاسیەكانەوە، ئەوا لە باكور سیاسیەكان ئەدەب ئەنوسنەوە.

د.ح